თბილისის მერია ქალაქის მაშტაბით 30-მდე საზოგადოებრივი საპირფარეშოს მოწყობას გეგმავს. მერია ტენდერის გამოცხადებას გეგმავს, გამარჯვებულ კომპანიას კი მიწის ნაკვეთი 20-წლიანი ვადით გადაეცემა.

მერია გეგმავს, რომ საპირფარეშოს სარგებლობის ღირებულების გადახდა როგორც ნაღდი ფულით, ასევე სპეციალური ბარათით - მეტრომანით იყოს შესაძლებელი.

როგორც მერიის პრესრელიზიდან ირკვევა, საზოგადოებრივი საპირფარეშო ადაპტირებული უნდა იყოს შეზღუდული შესაძლებლობების მქონე პირებისთვის, როგორც ტექნოლოგიური მოწყობილობით, ასევე ფართით. საინფორმაციო წარწერებზე კი გათვალისწინებული უნდა იყოს ბრაილის შრიფტი.

"აუქციონში გამარჯვებული ვალდებულებას აიღებს საზოგადოებრივი საპირფარეშოს მოვლა-პატრონობასა და სანიტარულ-ჰიგიენური პირობების დაცვაზე. მოიჯარე, ასევე, ვალდებული იქნება, უზრუნველყოს ცხელი ხაზის მუშაობა კვირაში შვიდი დღის განმავლობაში, 24 საათიანი სამუშაო რეჟიმით," - აღნიშნულია მერიის პრესსამსახურის მიერ გავრცელებულ ინფორმაციაში.

თბილისს უკვე აქვს რამდენიმე საზოგადოებრივი საპირფარეშო, რომელის მოსაწყობადაც ბიუჯეტიდან რამდენიმე ასეული ათასი ლარი დაიხარჯა. 2014 წელს გამოცხადებული ტენდერით მიწისქვეშა გადასასვლელებში აშენებული საპირფარეშოები ამ დრომდე არ მუშაობს.