სახელმწიფო ქონების ეროვნული სააგენტოს განცხადებით, რუსთაველის სამხატვრო ხელმძღვანელისთვის, რობერტ სტურუასთვის მიწის ნაკვეთის სიმბოლურ ფასად გადაცემა მისი ღვაწლის დაფასებაა. სააგენტოში ფიქრობენ, რომ საქართველოს მთავრობის გადაწყვეტილება გაუგებარი არავისთვის უნდა იყოს.

"რობერტ სტურუა თანამედროვეობის ერთ-ერთი უდიდესი ხელოვანია, მან ბევრი რამ გააკეთა საქართველოსთვის, მისი კულტურისთვის და ამდენად, არავისთვის გაუგებარი არ უნდა იყოს საქართველოს მთავრობის გადაწყვეტილების მართებულობა. ეს არის ქართული სახელმწიფოს მხრიდან სახელგანთქმული ქართველი რეჟისორის საქმიანობის და მისი ღვაწლის დაფასება", — ნათქვამია განცხადებაში.

სააგენტოს ცნობით, ეკონომიკის სამინისტროს საკითხზე შუამდგომლობით რუსთაველის თეატრმა მიმართა, სადაც, მათი თქმით, საქართველოს ხელოვნებისა და თეატრის მიმართ სტურუას დამსახურება იყო აღნიშნული. ქონების ეროვნულ სააგენტოში ამბობენ, რომ სამინისტრომ წინადადება განსახილველად მთავრობას გადასცა, რაც "რეჟისორის დამსახურების გათვალისწინებით" დადებითად გადაწყდა.

მათივე თქმით, უძრავი ქონებას სახელმწიფო აღარ ფლობს, ამიტომ მისი განკარგვის მართებულობის საკითხი სააგენტოს კომპეტენციაში არ შედის.

გუშინ, 5 თებერვალს TV პირველმა გაავრცელა ინფორმაცია, რომ სახელმწიფომ რუსთაველის თეატრის სამხატვრო ხელმძღვანელს, რობერტ სტურუას თბილისში, სოფელ თხინვალაში მდებარე 1500 კვ.მ მიწის ნაკვეთი სიმბოლურ ფასად გადასცა.

ეს ფაქტი იმ დოკუმენტებით დასტურდება, რომლის მიხედვითაც, სტურუა საჯარო რეესტრს მიწის ნაკვეთის სიმბოლურ ფასად გადაცემის მოთხოვნით მიმართავს.

აღსანიშნავია, რომ ვიდრე ამ განცხადების საფუძველზე საჯარო რეესტრი თბილისში მდებარე მიწის ნაკვეთს რობერტ სტურუას დაუკანონებდა, ეს ქონება სახელმწიფოს ეკუთვნოდა.

საჯარო დოკუმენტებითვე ირკვევა, რომ გადაფორმებიდან რამდენიმე დღეში სტურუამ მიწის ნაკვეთი როინ ნოზაძეს აჩუქა. მანამდე, მიწის ნაკვეთის სიმბოლურ ფასად გადაცემის პროცესში, როინ ნოზაძე სტურუას წარმომადგენელი იყო.

TV პირველთან თავად სტურუამ სახელმწიფოს მხრიდან მიწის ნაკვეთის სიმბოლურ ფასად გადაცემის ფაქტი უარყო. მან თქვა, რომ არც როინ ნოზაძეს იცნობს, რომელსაც აღნიშნული მიწა აჩუქა.

ამჟამად აღნიშნულ მიწის ნაკვეთსა და მასზე არსებულ 177.06 კვ.მ-ის შენობა-ნაგებობას შპს ჯეო-ოლიმპი ფლობს, რომლის 100%-იანი წილის მფლობელი აკაკი მოწონელიძეა. ტვ პირველის ინფორმაციით, რომელიც მათ მიერვე მოპოველ ნასყიდობის ხელშეკრულებას ეყრდნობა, როინ ნოზაძემ აკაკი მოწონელიძეს მიწის ნაკვეთი გასული წლის 2 დეკემბერს 221 250 დოლარად მიჰყიდა.

ამავე თემაზე: