პარტია გირჩი — მეტი თავისუფლების ლიდერი, ზურაბ ჯაფარიძე ამბობს, რომ მილიონი მიზეზის მოფიქრება შეიძლება, რატომ არ უნდა გავიდეს ხალხი ქუჩაში და გააპროტესტოს მიმდინარე მოვლენები. თუმცა, ჯაფარიძე ამბობს, რომ ასეთ შემთხვევაში "წუმპეში ვიჯდებით".

"არ გახვიდეთ გარეთ, არა, მილიონი მიზეზის მოფიქრება შეიძლება რატომ არ უნდა გახვიდეთ. თუ ვერ მოიფიქრებთ, "ოცნების" ბოტების კომენტარებს გადახედეთ, შემოგაშველებენ არგუმენტებს. ღმერთი გიშველით, ან ამერიკა, ან უცხოპლანეტელები. თუ ვერ გიშველით და მაგის დედაც მოვტ*ან, ვიჯდეთ წუმპეში და ვსვათ საქართველოს სადღეგრძელო. ოღონდ, პატრიარქის სადღეგრძელოს შემდეგ", — წერს ჯაფარიძე სოციალურ ქსელში.

ამ წუთებში რუსთაველზე აქცია მიმდინარეობს. მოქალაქეები ექსპრეზიდენტ მიხეილ სააკაშვილის სამოქალაქო კლინიკაში გადაყვანას ითხოვენ. ისინი 15:00 საათზე რესპუბლიკის მოედანზე შეიკრიბნენ და მსვლელობით პარლამენტის მიმდინარე ტერიტორიაზე გადაინაცვლეს. აქცია ნაციონალური მოძრაობის თავმჯდომარემ, ნიკა მელიამ მას შემდეგ დააანონსა, რაც სააკაშვილმა ციხის საავადმყოფოში გონება დაკარგა და რეანიმაციაში გადაიყვანეს.

აქციის მიმდინარეობისას იუსტიციის მინისტრმა, რატი ბრეგაძემ სპეციალური ბრიფინგი გამართა და სააკაშვილს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.

გუშინ, 18 ნოემბერს, მიხეილ სააკაშვილის ადვოკატმა, ბექა ბასილაიამ გლდანის მე-18 სამედიცინო დაწესებულებასთან განაცხადა, რომ სააკაშვილი ოთახიდან გასვლისას "მოსხლეტით წაიქცა" და ის საკაცით გაიყვანეს. ბასილაია ამბობს, რომ ექსპრეზიდენტს თვალები ხელით გაუხსნეს. ამის შემდეგ პენიტენციურმა გაავრცელა განცხადება, რომ სააკაშვილის ჯანმრთელობის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

გაიგე მეტი: