დაავადებათა კონტროლის ეროვნული ცენტრის დირექტორი, ამირან გამყრელიძე მოუწოდებს ექსპრეზიდენტ მიხეილ სააკაშვილს, რომ შეწყვიტოს შიმშილობა. მისი თქმით, პოლიტიკურ საკითხებზე კომენტარს არ აკეთებს, მაგრამ პროტესტის შედეგად სააკაშვილი იქცა პაციენტად და როგორც ექიმი ამაზე ისაუბრებს.

"მე ექიმი ვარ და როცა ჰიპოკრატეს ფიცს ვდებთ, პაციენტს არ ვასხვავებთ, იქნება ეს უმაღლესი თუ დაბალი თანამდებობის, არ ვასხვავებთ რასობრივი, სქესობრივი და ასე შემდეგ ნიშნებით. პაციენტი ჩვენთვის ყოველთვის პაციენტია და ექიმის მოვალეობაა, რომ პაციენტს ჩაუტაროს ყველა ის აუცილებელი დახმარება, რაც მას სჭირდება", — განაცხადა მან.

გამყრელიძემ მოუწოდა პოლიტიკოსებს და მედიას, გვერდით გადადონ პოლიტიკური საკითხები და კონცენტრირდნენ ჯანდაცვაზე. მისივე თქმით, ენდობა ორივე კონსილიუმს, როგორც პირველს, ასევე გაფართოებულს, ალტერნატიულს, ამიტომ სააკაშვილის მკურნალობისას ყველამ ამ საკითხებით უნდა იხელმძღვანელოს. ჟურნალისტებმა მას უთხრეს, რომ კონსილიუმი ექსპრეზიდენტთან შესვლას ვერ ახერხებს და არ აქვს ინფორმაცია მის ახლანდელ მდგომარეობაზე, შესაბამისად, ვერც რეკომენდაციებს გასცემს, რაზეც მან განაცხადა, რომ არსებობს პაციენტის უფლებების კანონი. მისი თქმით, ამ კანონით არსებობს მეორე აზრის მოთხოვნის უფლება და მას არ ჰგონია, რომ კონსილიუმს ჰქონდეს დაბრკოლება პაციენტთან კონტაქტის, თუ ამას საჭიროდ ჩათვლის სამედიცინო დაწესებულება.

"კანონი, რომელშიც პაციენტის უფლება არის ერთ-ერთი ყველაზე უზენაესი და მას უნდა უტარდებოდეს ყველა ტიპის საჭირო სამედიცინო დახმარება. ამავე დროს მე იმ თაობის წარმომადგენელი ვარ, რომელმაც გააუქმა სიკვდილით დასჯა. ამიტომ გამომდინარე ყველაფრისგან, რაც მე ჩამოგითვალეთ, ტყუილად არ ვთქვი.

მე, როგორც ექიმი ამირან გამყრელიძე და არა დღევანდელი თანამდებობის პირი, მოვუწოდებ დაჟინებით ბატონ მიხეილს, რომ შეწყვიტოს შიმშილობა, რამეთუ ეს უკვე მისი ჯანმრთელობისთვის ცეცხლთან თამაშია. ანუ იქ ძალიან სწრაფად და ყოველთვის შეიძლება განვითარდეს სიცოცხლისთვის შეუთავსებელი გართულებები", — განაცხადა მან საკოორდინაციო საბჭოს სხდომის შემდეგ.

გამყრელიძემ აღნიშნა, რომ როგორც შიმშილობა, ისე შეწყვეტის შემდგომი პერიოდი რთულია და ხაზი გაუსვა, რომ უნდა დაეყრდნონ გაფართოებული კონსილიუმის მოწოდებებს იმაზე, თუ რა ტიპის მონიტორინგი სჭირდება სააკაშვილს, რა ტიპის რეაბილიტაცია და სად უნდა ჩატარდეს ეს.

"კიდევ ერთხელ ხაზს ვუსვამ, შექმნილი კონსილიუმი, როგორც ერთი, ისევე მეორე არის საკმაოდ ავტორიტეტული ადამიანების, რომლებსაც შეუძლიათ დამოუკიდებელი დასკვნის დადება და კეთილი ვინებოთ და მერე ეს დასკვნა აღვასრულოთ", — განაცხადა მან.

გამყრელიძემ ვრცლად ისაუბრა იმაზე, რომ აქვს საკმაოდ ახლო ურთიერთობა ექსპრეზიდენტის ოჯახთან და თავად სააკაშვილსაც კარგად იცნობს, მაგრამ მიუხედავად ამ ურთიერთობისა ბევრ საკითხში მისი და ექსპრეზიდენტის შეხედულებები ფუნდამენტურად განსხვავებული იყო.

"მე ვიცნობ საკმაოდ კარგად საქართველოს მესამე პრეზიდენტს. ჩვენ ერთად მოგვიწია მუშაობა პარლამენტში 90-იანი წლების ბოლოს. იქედან ვიცნობ. ასევე, საქართველოს მთავრობაში, როცა ჯანდაცვის სამინისტროში სხვადასხვა პოზიციაზე, მათ შორის უმაღლესზე ვმუშაობდი, მქონია ხშირად განხილვა სხვადასხვა საკითხთან მიმართებაში პოზიციების დაფიქსირება. დაგიდასტურებთ, რომ მე ახლო ურთიერთობა მაქვს მის ოჯახთან, კარგად ვიცნობ და ვმეგობრობ მის მამასთან, ბატონ ნიკასთან. ერთად საკმაოდ დიდი ხანი ვმუშაობდით მაშინდელ სამედიცინო ინსტიტუტში და შემდეგ ბატონი ნიკა მუშაობდა სამინისტროში მაშინ, როცა მე მაღალი თანამდებობები მეკავა. ასევე, დაგიდასტურებთ, რომ საკმაოდ ახლო ურთიერთობა მაქვს მის დედასთან, ქალბატონ გიულისთან. [...]

ბატონი მიხეილის ბებია იყო ჩემი მასწავლებელი, მასწავლიდა ჰისტოლოგიას, ძალიან კარგი ქალბატონი ქალბატონი ნათელა წუწუნავა. ასევე, მისი მეორე ბებია ქალბატონი მზია წერეთელი, რომელთანაც მე ხანგრძლივი საქმიანი ურთიერთობა მქონდა და მისი ძმებიც. ანუ ოჯახთან საკმაოდ კარგი ურთიერთობა მაქვს, ასევე, რა თქმა უნდა მის მეუღლესთან ქალბატონ სანდრასთან", — განაცხადა მან.

მიხეილ სააკაშვილი 47-ე დღეა შიმშილობს. ექსპრეზიდენტი, ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. სამედიცინო სფეროს არაერთმა წარმომადგენელმა განაცხადა, რომ გლდანის ციხის სამკურნალო დაწესებულება არ არის მრავალპროფილური და ვერ აკმაყოფილებს იმ სტანდარტებს, რაც მიხეილ სააკაშვილის სამკურნალოდ არის საჭირო. 8 ნოემბერს ექსპრეზიდენტი მისი და ადვოკატების სურვილის საწინააღმდეგოდ მაინც გლდანის ციხის დაწესებულებაში გადაიყვანეს.

ამავე თემაზე:

• იუსტიციის მინისტრის თქმით, სააკაშვილთან კონსილიუმს მაშინ შეუშვებენ, როცა დამატებითი რეკომენდაციები დასჭირდებათ
• ბრეგაძე: სააკაშვილზე მიზანმიმართულად ვრცელდება დეზინფორმაცია, ამიტომ ექიმები ყოველდღე გააკეთებენ განმარტებებს
• გაბუნია ამბობს, რომ კონსილიუმი რუსთავის ციხეში იყო საჭირო, გლდანში კი აღარ არის