უკრაინის სახალხო დამცველი ლუდმილა დენისოვა ხვალ გლდანის ციხის საავადმყოფოში ექსპრეზიდენტ მიხეილ სააკაშვილის მონახულებას აპირებს. როგორც ის Facebook-ზე წერს, საქართველოს იუსტიციის სამინისტროსგან ვიზიტზე ამჟამად უარი არ მიუღია. დღეს ის მიხეილ სააკაშვილის ადვოკატებს შეხვდა.

"სულ ახლახან გავრცელდა ინფორმაცია, რომ ექიმთა კონსილიუმის წევრმა, ნინო შარაშენიძემ საქართველოს ხელისუფლებას მიხეილ სააკაშვილისთვის გასტროენტეროლოგის ჩართვის აუცილებლობის შესახებ აცნობა, მას შემდეგ, რაც მას სისხლდენა დაეწყო. თუმცა, კონსილიუმს უკვე მეორე დღეა შესაბამისი პროცედურების ჩასატარებლად მიხეილთან წვდომა არ აქვს. იმედი მაქვს, ხვალ პირადად შევამოწმებ უკრაინის მოქალაქის მდგომარეობას, №18 სასჯელაღსრულების დაწესებულებაში ვიზიტის დროს.

მიხეილ სააკაშვილი 46-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.