22 წლის ავღანელი სტუდენტი, აიშა აჰმადი ორშაბათს აეროპორტში იმ იმედით მივიდა, რომ თალიბანის სასტიკ რეჟიმს გაექცეოდა, მაგრამ ვერ შეძლო. აიშა CNN-ს საკუთარ გამოცდილებას უზიარებს და ყვება, თუ რატომ ეშინია მომავლის.

მას თავდაპირველად ამერიკის შეერთებულ შტატებში მცხოვრებმა მეგობარმა დაურეკა და უთხრა, რომ მოსახლეობა ავღანეთს სამხედრო ფრენების საშუალებით ტოვებდა. აჰმადისთვის ეს ამბავი დაუჯერებელი აღმოჩნდა მანამ, სანამ არ ესაუბრა მეორე მეგობარს, რომელმაც ინფორმაცია სამხედრო ფრენების შესახებ დაადასტურა.

როდესაც აიშა აეროპორტისკენ გარბოდა, ქუჩებში ჯერ კიდევ სიმშვიდე იყო, თუმცა აეროპორტში სხვა რეალობა დახვდა — იქაურობა სავსე იყო ათასობით ადამიანით, რომლებსაც პასპორტებიც კი არ ჰქონდათ თან.

"ეს იყო განკითხვის დღე. ერთ მომენტში ვიფიქრე, რომ ეს დასასრულია და მე მოვკვდებოდი", — ამბობს აჰმადი.

ფოტო: BBC

აიშამ თვითმფრინავში ასვლა და ქაბულის დატოვება ვერ შეძლო და აეროპორტიდან ნაკაწრებითა და სისხლჩაქცევებით გამოვიდა.

თალიბანის სპიკერმა და ლიდერებმა განაცხადეს, რომ ისინი ქალებსა და გოგოებს სკოლაში სიარულის უფლებას მისცემენ, თუმცა ავღანეთის მოსახლეობა ამ დაპირების მიმართ სკეპტიკურადაა განწყობილი, მათ ახსოვთ თალიბანის მმართველობა ოცი წლის წინ, როდესაც ქალებს აკრძალული ჰქონდათ განათლების მიღება, მუშაობა და თავისუფლად ცხოვრება.

"ზოგი ამბობს, რომ თალიბანი შეიცვალა, დანარჩენები ამბობენ, რომ ის არ შეცვლილა, სიმართლე გითხრათ მე არ მჯერა თალიბანის", — ამბობს აჰმადი.

აიშა ტვიტერზე მისთვის გამოგზავნილ მუქარის შემცველ მიმოწერას აქვეყნებს, სადაც თალიბანის მიმართ დამოკიდებულების გამო მოკვლით ემუქრებიან. აჰმადი წერს, რომ ის არავის და მათ შორის არც თალიბანს შეურაცხყოფას არ აყენებს და მხოლოდ საკუთარ, პერსონალურ შეხედულებებს აფიქსირებს.

თალიბანის ლიდერებმა განაცხადეს, რომ ადამიანებმა უნდა განაგრძონ ყოველდღიური ცხოვრება. აიშა ტელევიზიით გადმოცემული ვითარებიდან გამომდინარე ფიქრობს, რომ სკოლაში დაბრუნება შეუძლია, მაგრამ ამაში დარწმუნებული მაინც არ არის.

22 წლის აიშას ეშინია, რომ ვერ შეძლებს სწავლის დასრულებას და წუხს იმის გამო, რომ მომავალი დღეებისა და კვირების შემდეგ ქალების ცხოვრება ავღანეთში კიდევ უფრო გართულდება.

"გარეთ არც ისე ბევრი ხალხია და მათ არ იციან, როგორი იქნება ყოველდღიური საქმიანობა, როდესაც ცხოვრება ჩვეულ რიტმს დაუბრუნდება. აიძულებენ ისინი მაღაზიებს ლოცვის დროს დაკეტვას? დასჯიან მათ ვინც მეჩეთში არ წავა? აიძულებენ თუ არა ხალხს იქ სიარულს?... არავინ იცის", — ამბობს აიშა აჰმადი.