მარკ ზაკერბერგმა ჯიბის ახალი გაჯეტი, სახელად Meta Charm, წარადგინა. მოწყობილობა კომპანიის AI ასისტენტ Muse-თან სამუშაოდაა შექმნილი. ჭკვიანი სათვალეების წარმატების შემდეგ, Meta ახალი ტიპის მოწყობილობების შექმნაზე გადადის.

ხელოვნური ინტელექტისთვის განკუთვნილ ამ ახალ მოწყობილობას დაახლოებით 2-დუიმიანი სენსორული ეკრანი და ჩაშენებული 5G კავშირი აქვს. ზომით ის Apple AirPods-ის დამტენ ყუთს წააგავს.

"ჩვენ Muse-ის სრულ შესაძლებლობებს — რეალურ დროში ხმოვან და ავატარის სისტემას — გასაღების საკიდის ზომის მოწყობილობაში ვაერთიანებთ, რომელიც მომხმარებელთან სასაუბროდ ყოველთვის მზადაა", — განაცხადა მარკ ზაკერბერგმა, Meta-ს აღმასრულებელმა დირექტორმა, კალიფორნიაში გამართულ ყოველწლიურ ღონისძიებაზე, Meta Connect-ზე.

Meta Charm გაყიდვაში საახალწლო პერიოდში, დეკემბერში, ჩაეშვება. მეორე მხრივ, პროდუქტის ფასი კომპანიას ჯერ არ დაუსახელებია.

Meta-სგან ეს მოულოდნელი სიახლე იმ ფონზე შევიტყვეთ, რომ სილიკონ ველზე სმარტფონის შემცვლელს აქტიურად ეძებენ. ტექნოლოგიური გიგანტები მილიარდობით დოლარს დებენ ხელოვნურ ინტელექტზე დაფუძნებულ მოწყობილობებში, რომლებსაც გარემოს დანახვა, მოსმენა და მასზე რეაგირება შეუძლია. ჭკვიანი სათვალეებიდან და სამაგრებიდან დაწყებული, ჯიბის მოწყობილობებით დამთავრებული — კომპანიები იმედოვნებენ, რომ AI ტექნოლოგიასთან ადამიანების ურთიერთობას სრულიად შეცვლის. მეორე მხრივ, ჯერ გაურკვეველია, რა ფორმატის გაჯეტი გახდება მთავარი მომხმარებლებისთვის.

Meta-მ AI მოწყობილობების შექმნა ჭკვიანი სათვალეებით დაიწყო. EssilorLuxottica-სა და Ray-Ban-თან პარტნიორობა ამ კატეგორიაში ერთ-ერთ პირველ წარმატებულ პროექტად იქცა. სოციალური ქსელების გიგანტმა თავისი პირველი VR მოწყობილობაც წარადგინა, რომელიც იმდენად თხელია, რომ ჩვეულებრივ სათვალეს წააგავს. გარდა ამისა, წარადგინეს კამერის გარეშე მომუშავე ჭკვიანი სათვალე. ეს უკანასკნელი იმ უკმაყოფილების შესამცირებლად შეიქმნა, რომელიც ადამიანების უნებართვო გადაღებასა და კონფიდენციალურობის დარღვევას უკავშირდება.

Meta-ს მოწყობილობებს Muse-ის მხარდაჭერა ექნება

კომპანიამ პოპულარული AI ასისტენტი Muse ჭკვიან სათვალეებში ჩააინტეგრირა. ასისტენტს ახალი ფუნქციები დაემატა, მათ შორის კომპიუტერის მართვა და მსხვილ სავაჭრო ქსელებთან ინტეგრაცია, იქნება ეს Walmart, Best Buy თუ Gap. Meta-ს განცხადებით, Muse სათვალეების ძირითადი ინტერფეისი გახდება. მომხმარებლები ხმოვანი ბრძანებებით პროდუქტების შეძენას, შეხვედრების დაგეგმვასა და სხვადასხვა დავალების შესრულებას შეძლებენ.

Meta-ს VR სათვალე, რომლის ფასიც 1 299 აშშ დოლარია, ძვირადღირებულ კონკურენტს გაუწევს მეტოქეობას, მათ შორის Apple Vision Pro-ს. Meta-ს მოწყობილობა დაახლოებით ბანქოს დასტის წონისაა. ასეთი მსუბუქი დიზაინი ელემენტისა და პროცესორის ცალკე ბლოკში გადატანით მიიღეს. პროდუქტი ბაზარზე 2027 წლის გაზაფხულზე გამოვა.

მოწყობილობა მუქი ჩარჩოთია აღჭურვილი და თვალების, ხმისა თუ ხელის ჟესტებით იმართება. Meta-ს ვარაუდით, ეს გაჯეტი ვირტუალური რეალობის ტექნოლოგიის მასობრივად დამკვიდრებას შეუწყობს ხელს. აქამდე ამას მაღალი ფასი და მძიმე, მოუხერხებელი ჩაფხუტები აფერხებდა.

"წონის 100 გრამამდე შემცირება შთამბეჭდავია და მომხმარებლის გამოცდილებას საგრძნობლად გააუმჯობესებს", — აღნიშნა კვლევითი კომპანია Smart Analytics Group-ის დამფუძნებელმა, ლინდა სუიმ. — "მეორე მხრივ, ის ძირითადად მაინც იმავე მიზნებისთვის გამოიყენება, რისთვისაც წინა VR ჩაფხუტები. მაღალი ფასის გამო ფართო აუდიტორიის მიზიდვა შეიძლება მაინც გაჭირდეს".

ახალ სათვალეს, სახელწოდებით Ray-Ban Meta Audio, კამერა არ აქვს, თუმცა ხმის ჩაწერა შეუძლია. კამერიანი მოდელებისგან განსხვავებით, რომლებიც გადაღებისას ანათებს, ეს მოდელი გარშემომყოფებს ჩაწერის შესახებ არ ატყობინებს. კრიტიკოსების აზრით, მხოლოდ კამერის ამოღება კონფიდენციალურობის პრობლემას სრულად ვერ აღმოფხვრის.

Meta Audio კომპანიისა და EssilorLuxottica-ს თანამშრომლობით შექმნილი უახლესი პროდუქტია. მისი გაყიდვა 13 ოქტომბრიდან დაიწყება და მისი საწყისი ფასი 349 დოლარი იქნება. ეს უახლეს კამერიან Ray-Ban სათვალეზე 100 დოლარით ნაკლებია. ამ უკანასკნელს კამერები ისევ ექნება და ორ ახალ სტილში — კლასიკურ Aviator-სა და "კატის თვალის" Zena ფორმით — გამოვა.

კონფიდენციალურობის პრობლემა კვლავ აქტუალურია

Meta ყურადღების ცენტრში იმ მოწყობილობების გამო მოექცა, რომლებიც, რაც მეტს ხედავს და ისმენს, მით უკეთ მუშაობს. ამის გამო კომპანიას სასამართლო დავებიც შეექმნა, გაერთიანებულ სამეფოში კი ზოგიერთ დაწესებულებაში ასეთი მოწყობილობების გამოყენება აკრძალეს. ამ დისკუსიის შედეგზეა დამოკიდებული იმ ბაზრის ჩამოყალიბება, რომელსაც ტექ-გიგანტები სმარტფონების მომავალს უწოდებენ.

"კომპანია კონფიდენციალურობის ზოგ პრობლემას აგვარებს, თუმცა ხმის უნებართვოდ ჩაწერისა თუ ბოროტად გამოყენების რისკი მაინც რჩება. მთავარი საკითხი სწორედ მომხმარებლის თანხმობაა", — განაცხადა კვლევითი კომპანია IDC-ს დირექტორმა, ჯითეშ უბრანიმ — "Meta-მ გარშემომყოფების გაფრთხილების გზა უნდა იპოვოს მაშინაც კი, თუ საქმე მხოლოდ აუდიოჩანაწერს ეხება".

კამერის გაუქმებამ შეიძლება პროდუქტზე მოთხოვნა შეამციროს, ვინაიდან ფოტოებისა და ვიდეოების გადაღება ჭკვიანი სათვალეების ერთ-ერთი ყველაზე პოპულარული ფუნქციაა. გარდა ამისა, ახალი აქსესუარი პირდაპირ კონკურენციაში შევა Apple-ის AirPods-ის მსგავს მოწყობილობებთან.

Meta-ში აცხადებენ, რომ კამერაზე უარის თქმის მიზეზი მხოლოდ კონფიდენციალურობა არ ყოფილა და კამერის გარეშე მომუშავე სათვალეებს თავისი ბაზარი აქვს.

"აუდიოფუნქცია პირველივე დღიდანვე ყველაზე მოთხოვნადი იყო, რადგან ჩვენი სათვალე მაღალი ხარისხის ხმას გთავაზობთ ისე, რომ გარე სამყაროს არ წყდებით", — აღნიშნავს კომპანია.

კამერის ამოღებამ Meta-ს საშუალება მისცა, ყველაზე თხელი მოდელი შეექმნა, რომელიც საგრძნობლად უფრო მსუბუქია. ამან ახალი დიზაინების შექმნასაც შეუწყო ხელი, მათ შორის Clubmaster-ისა და რეტრო სტილის Burbank-ის. ამასთან ერთად, ელემენტის მუშაობის ხანგრძლივობა ერთ დამუხტვაზე 12 საათამდე გაიზარდა მაშინ, როცა მესამე თაობის კამერიანი Ray-Ban სათვალე მხოლოდ 9 საათს ძლებდა.