პრემიერმინისტრის, ირაკლი ღარიბაშვილის განცხადებით, კორონავირუსის პანდემია წლის ბოლოს არ დასრულდება და ის შესაძლოა მომდევნო 2-3 წლის განმავლობაში გაგრძელდეს.

"ისე მიმდინარეობს ტენდენცია გლობალური და ვისმენთ რა ჩვენ ჯანმრთელობის მსოფლიო ორგანიზაციის წარმომადგენლების შეფასებებს, მათ პროგნოზებს, ეს პანდემია გაგრძელდება, მეგობრებო. ეს არ დასრულდება წლის ბოლოს. ვინმეს არ ჰქონდეს იმის განცდა, რომ პანდემია დასრულდება მთელს მსოფლიოში წლის ბოლოს, არ იქნება ასე, არ მოხდება. შესაძლოა, გაგრძელდეს კიდევ რამდენიმე წელიწადი, 2-3 წელიწადი. მეცნიერები ვერ ამბობენ ზუსტ პროგნოზს, რადგან დამოკიდებული არიან ადამიანების ქცევაზე, ჩვენი ქცევა რა უნდა იყოს ამ შემთხვევაში — აუცილებელია აცრის ჩატარება, როგორც ადამიანები იცრებიან ჩეულებრივ გრიპის საწინააღმდეგო ვაქცინით, ანალოგიურად მიმდინარეობს საუბარი იმაზე, რომ ანალოგიურად დაიწყება და დამკვიდრდება მომდევნო 2-3 წლის განმავლობაში აღნიშნული აცრების ჩატარება", — განაცხადა ღარიბაშვილმა.

13 აგვისტოს მონაცემებით, საქართველოში კორონავირუსის 5 359 ახალი შემთხვევა დადასტურდა, გამოჯანმრთელდა 2 726, ხოლო გარდაიცვალა — 42 ადამიანი.

ბოლო 24 საათში ქვეყნის მასშტაბით ჩატარდა 50 937 კვლევა ტესტით, მათ შორის, 30 325 კვლევა ანტიგენის ტესტით და 20 612 PCR ტესტით.

რაც შეეხება დადებითობის მაჩვენებელს, 13 აგვისტოს მდგომარეობით, დადებითობის დღიური მაჩვენებელი არის 10,52%, ბოლო 7 დღის მანძილზე — 10,74%, ხოლო 14 დღის მანძილზე — 9,9%.