თბილისის ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის განცხადებით, საველე ჰოსპიტლები აუცილებლად უნდა გაკეთდეს. მისი თქმით, ჯანდაცვის სისტემას სხვა გამოსავალი არა აქვს.

"როცა უკვე საველე ჰოსპიტლებზეა ლაპარაკი, გასაგებია, რა დღეშია ჰოსპიტალური სექტორი. უნდა გაკეთდეს ეს, სხვა გამოსავალი არა აქვს უკვე ჯანდაცვის სისტემას [...] როდესაც უკვე ლაბორატორიული მონაცემები იწყებს გაუმჯობესებას, იძულებულები ვართ, გავწეროთ პაციენტები და დავაწვინოთ ახალი. თუმცა ესეც აღარ არის საკმარისი, როდესაც ამდენია დაინფიცირებული. ყველა უნდა ვიყოთ პირბადით, ეს აუცილებელია", — აცხადებს ის.

დღეს ჯანდაცვის სამინისტროს კოვიდპაციენტებისთვის მაქსიმუმ 8 000 საწოლის გამოყენება შეუძლია. ჯანდაცვის მინისტრს, ეკატერინე ტიკარაძეს არაერთხელ უსაუბრია იმაზე, რომ საწოლფონდთან მიმართებაში ჯანდაცვის სექტორი უკვე "გარკვეულ ზღვარზეა". 11 აგვისტოს ტიკარაძემ თქვა ისიც, რომ სამინისტრო უკვე ზრუნავს იმ სივრცეების მობილიზებაზე, სადაც, შესაძლოა ე.წ. საველე ჰოსპიტლები განათავსონ. ტიკარაძის თქმით, ეს მისთვის ძალიან არასასურველი გადაწყვეტილება იქნება, თუმცა შიდა ჯგუფებში მაინც საუბრობენ ე.წ. საველე ჰოსპიტლების საჭიროებაზე.