მოძრაობა სირცხვილიას წევრები პროკურატურის მიერ მიღებული გადაწყვეტილების გასაჩივრებას აპირებენ. უწყებამ ისინი 5 ივლისის ძალადობრივ თავდასხმაში დაზარალებულად არ ცნო იმის მიუხედავად, რომ ძალადობრივი ჯგუფები სწორედ მათ ოფისში შეჭრას ცდილობდნენ.

აქტივისტები განმარტავენ, რომ კონსტანტინე მორგოშიამ მხარდამჭერები მათ მისამართზე წაიყვანა, სადაც სადარბაზოს კარი ჩაამტვრიეს და სართულებზე მეზობლებს უბრახუნებდნენ იმისთვის, რომ მათი ოფისის კარისთვის მიეგნოთ. აქტივისტების თქმით, ამ ფონზე იმის თქმა, რომ ძალადობის ადრესატები არ ყოფილან, სამარცხვინო და ცინიკურია.

მოძრაობის ინფორმაციით, პროკურორმა თავისი გადაწყვეტილება შემდეგნაირად დაასააბუთა:

"საქმეში მოპოვებული მტკიცებულებების თანახმად, არ დასტურდება, რომ უშუალოდ აღნიშნული პირები წარმოადგენდნენ დანაშაულებრივი ქმედებების ადრესატებს".

როგორც სირცხვილიას წევრი განმარტავს, მათ მოითხოვეს დაზარალებულის სტატუსი, რათა გარკვეულ დოკუმენტაციაზე დამატებით ჰქონდოდათ წვდომა. მისი ვარაუდით, სწორედ ეს გახდა დაზარალებულად ცნობაზე უარის მიზეზი.

სირცხვილიას განცხადებით, 5 ივლისს სირცხვილიას ოფისზე თავდასხმის მომენტში მარიამ დოლიძე, ზუკა ბერძენიშვილი, სალომე ბარკერი და გიგა მაქარაშვილი ოფისში იყვნენ, როდესაც ძალადობრივი ჯგუფის წევრები მუქარისა და სიტყვიერი შეურაცხყოფის პარალელურად, კარის შემტვრევასა და ოფისში შეღწევას ცდილობდნენ.

5-6 ივლისს ჰომოფობიურ და ძალადობრივი ჯგუფების თავდასხმის შედეგად 50-ზე მეტი ადამიანი დაშავდა, მათგან უმრავლესობა მედიის წარმომადგენელია. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.

წაიკითხეთ ასევე: