ყოფილი პრემიერმინიტრისა და პარტია საქართველოსთვის ლიდერის, გიორგი გახარიას განცხადებით, იმის მაგივრად, რომ შევაფასოთ "ისწავლა მთავრობა ჭკუა თუ არა", პირბადე უნდა ვატაროთ. ასე საუბრობს ის რთულ ეპიდემიოლოგიურ ვითარებაზე და აცხადებს, რომ ახლა არ არის დრო, რომ ვარკვიოთ, ვინ რაშია დამნაშავე.

"დღეს ეპიდემიოლოგიური სიტუაცია იმდენად არის დამძიმებული ქვეყანაში, რომ უკვე თითოეული ჩვენგანის, მოქალაქის პასუხისმგებლობაა, ელემენტარული წესები დავიცვათ. მე მესმის მოქალაქეების აღშფოთების, მაგრამ მერწმუნეთ, დღეს არ არის იმის დრო, რომ ვარკვიოთ, ვინ რაშია დამნაშავე და ვისი ბრალია. დღეს არის იმის დრო, რომ ყველამ ზედმიწევნით შევასრულოთ ელემენტარული წესები, იმისთვის, რომ ჩვენი ოჯახის წევრები დავიცვათ, ჩვენი ბავშვები, ხანდაზმულები.

არ არის ახლა სწორი მთავრობაზე თავდასხმა და იმის გარკვევა, ვინ როდის რა შეცდომა დაუშვა. ეს ცოტა მოგვიანებით შეიძლება გავაკეთოთ, მაშინ, როდესაც ამ ძალიან მძიმე ეპიდემიოლოგიური კრიზისიდან გამოვალთ. ახლა ყველამ უნდა ვატაროთ პირბადე და ნებისმიერი თავშეყრის ადგილში, ღია სივრცეშიც პირბადის გარეშე საერთოდ ყველანაირად უნდა ავერიდოთ", — განაცხადა მან.

ექსპრემიერის განცხადებით, მთავრობის ნებისმიერი გადაწყვეტილება თუ ნაბიჯი ჰოსპიტალური სისტემის მართვის ან ეპიდემიოლოგიური რისკების დაზღვევის ნაწილში "უაღრესად კომპლექსურია", რომელსაც ცოდნა სჭირდება. მისი თქმით, გამომდინარე იქიდან, რომ ამაზე საკმარისი ინფორმაცია მას დღეს არა აქვს, ვერ შეაფასებს.