კოვიდგადატანილი ადამიანები ვაქცინის პირველი დოზის შემდეგ გათანაბრდებიან სრულად ვაქცინირებულ პირებთან, შესაბამისად, მათზე და ორჯერადად აცრილ ადამიანებზე ერთი და იგივე რეგულაციები გავრცელდება. საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განმარტებით, ეს ეხება, საქართველოში შემოსვლის მსურველ ადამიანებს — აქამდე საზღვრის კვეთა შეზღუდვების გარეშე მხოლოდ ორჯერადად აცრილ ადამიანებს შეეძლოთ, ახლა ამის შესაძლებლობა ერთი დოზით აცრილ ადამიანებსაც ექნებათ, თუ მათ იქამდე კოვიდი აქვთ გადატანილი. ცვლილება ეხება სემინარებზე, ვორქშოპებზე და სხვა შეკრებებზე დასწრების შესაძლებლობასაც.

"ბევრი ქვეყნის პრაქტიკა არის, როდესაც ადამიანს გადატანილი აქვს უკვე კოვიდი, იქ იცრებიან მხოლოდ ერთხელ და ის ითვლება სრულად ვაქცინირებულ პირად. შესაბამისად, ჩვენთანაც ხდება გათანაბრება ამ სტატუსის და თუ ადამიანს გადატანილი აქვს და ერთხელ არის აცრილი, იგივე სტატუსი აქვს, რაც ორჯერ აცრილ ადამიანს", — განაცხადა გიორგი ღიბრაძემ.

ჯანდაცვის მინისტრის მოადგილის, თამარ გაბუნია ამბობს, რომ ცვლილება სწორედ იმ ქვეყნებში გაცემული კოვიდპასპორტების საქართველოში აღიარებას გულისხმობს, სადაც კოვიდგადატანილი პირები ერთი ზოდის შემდეგ სრულად ვაქცინირებულებად ითვლებიან.

"თუ პირმა თავის ქვეყანაში მიიღო უკვე სრულად ვაქცინირებულის სტატუსი, ეს ჩვენც უნდა ვაღიაროთ, რადგან მათი პროტოკოლით, ერთხელ ვაქცინირებული, თუ დაავადება აქვს გადატანილი, ითვლება, რომ არის სრულად ვაქცინირებული", — განმარტავს თამარ გაბუინია.

ჯანდაცვის მინისტრის მოადგილემ ხაზგასმით აღნიშნა, რომ სტატუსის გათანაბრების მიუხედავად საქართველოში სავალდებულოდ რჩება კოვიდგატანალი პირების ორი დოზით აცრა.