შინაგან საქმეთა სამინისტროს ინფორმაციით, დააკავეს 35 წლის პირი, რომელმაც გუშინ, ბორჯომში, ინგოროყვას ქუჩაზე მომხდარი დაპირისპირებისას კაცი დაჭრა. არსებული ინფორმაციით, დაჭრილი საავადმყოფოში საკუთარი ფეხით მივიდა, თუმცა სიცოცხლისთვის შეუთავსებელი დაზიანებების გამო ის კლინიკაში გარდაიცვალა.

"გამოძიებით დადგინდა, რომ მიმდინარე წლის 6 აგვისტოს, ბორჯომში, ინგოროყვას ქუჩაზე, ბრალდებულსა და 1984 წელს დაბადებულ, წარსულში მრავალჯერ ნასამართლევ ლ.ნ.-ს შორის მოხდა კონფლიქტი, რა დროსაც ლ.ნ.-მ ავტომატური ცეცხლსასროლი იარაღიდან რამდენჯერმე გაისროლა, ხოლო ბრალდებულმა მას ცივი იარაღით ჭრილობები მიაყენა. დაჭრილი მამაკაცი საავადმყოფოში მისვლის შემდეგ გარდაიცვალა", — ვკითხულობთ შსს-ს განცხადებაში.

უწყების ინფორმაციით, ნივთმტკიცებად ამოღებულია АК 74-ის მოდელის ავტომატური ცეცხლსასროლი იარაღი.

გამოძიება საქართველოს სსკ-ის 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.