გარემოს ეროვნული სააგენტო საქართველოში 9 აგვისტომდე მაღალ ტემპერატურას პროგნოზირებს. მათი ცნობით, მცირე ხანმოკლე წვიმა ელჭექით მხოლოდ საქართველოს ცალკეულ რაიონშია შესაძლებელი. სინოპტიკოსებით ინფორმაციით, დასავლეთ საქართველოში 6-7 აგვისტოს შესაძლებელია 40 გრადუსს, ხოლო 7-9 აგვისტოს აღმოსავლეთ საქართველოში 39 გრადუსს გადააჭარბოს.

6-7 აგვისტოს შავი ზღვის სანაპირო რაიონებში, ზემო იმერეთში, კოლხეთის დაბლობსა და გორი-სურამის მონაკვეთზე აღმოსავლეთის მიმართულების ძლიერი ქარი იქროლებს.

შინაგან საქმეთა სამინისტროს საგანგებო სიტუაციების მართვის სამსახური მოსახლეობას ტემპერატურის მკვეთრ მატებასა და მოსალოდნელ ხანძრებზე აფრთხილებს. საგანგებო სიტუაციების მართვის სამსახური მოგიწოდებთ, გამოიჩინოთ მაღალი სამოქალაქო პასუხისმგებლობა, არ დაანთოთ ცეცხლი სასოფლო სამეურნეო სავარგულებზე, ტყის ან ველის სიახლოვეს და ცეცხლის კერები უყურადღებოდ არ დატოვოთ.