ლიეტუვის სეიმის საგარეო საქმეთა კომიტეტის თავმჯდომარის, ჟიგიმანტას პავილიონისის თქმით, მედიასა და სიტყვის თავისუფლებაზე შეტევა ავტოკრატიაზე მიუთითებს. პავილიონისი აცხადებს, რომ საქართველოს მთავრობამ ყველაფერი უნდა გააკეთოს ძალადობის შესაჩერებლად და აუცილებლად უნდა გამოავლინოს 5 ივლისის ძალადობრივი ქმედებების ორგანიზატორები, რომლებიც რუსეთთან არიან კავშირში.

"ვიმედოვნებ, მთავრობა ამ რადიკალიზმს შეაჩერებს, 5 ივლისის ძალადობაზე შესაბამის გამოძიებას ჩაატარებს, მოსპობს სიძულვილის ენას და ძალადობას, რომელიც ძალიან შესამჩნევი გახდა. დემოკრატიაში ოპოზიციას რადიკალურ ძალად არ მოიხსენიებენ, ყველა აზრს პატივს სცემენ, ცდილობენ საუკეთესო გამოსავალი იპოვონ. იგივე ეხება მედიასა და სიტყვის თავისუფლებას — როდესაც მედიასა და სიტყვის თავისუფლებაზე შეტევას მიიტან, ეს ავტოკრატიაზე მიუთითებს. მედიისა და აზრის გამოხატვის თავისუფლების დაცვა მიუთითებს, რომ შენ განსხვავებული აზრის, განსხვავებული შეხედულებისა და კრიტიკის არ გეშინია. საქართველოს მთავრობამ ყველაფერი უნდა ქნას, რომ სიძულვილი და ძალადობა შეაჩეროს, გამოავლინოს ორგანიზატორები, რომლებიც ჩვენი ინფორმაციით, რუსეთთან კავშირში არიან", — განაცხადა ჟიგიმანტას პავილიონისმა [მთავარი არხის თარგმანი].

5 ივლისს, როცა თბილისში ღირსების მარში უნდა ჩატარებულიყო, ჰომოფობიური და ძალადობრივი ჯგუფები რუსთაველის გამზირზე გამოვიდნენ და ფიზიკურად გაუსწორდნენ 50-ზე მეტ ჟურნალისტს, დაარბიეს თბილისი პრაიდის ოფისი, სცადეს სირცხვილიას ოფისში შეჭრა და თავს დაესხნენ პოლონელ ტურისტს. 11 ივლისს გარდაიცვალა TV პირველის ოპერატორი, ალექსანდრე ლაშქარავა, რომელსაც ძალადობრივი ჯგუფები 5 ივლისს ფიზიკურად გაუსწორდნენ. საქართველოს პრემიერმინისტრმა, ირაკლი ღარიბაშვილმა ღირსების მარშს "მიუღებელი" უწოდა. მართალია, მან მედიაზე ძალადობა დაგმო, ამის შემდეგ კი კრიტიკული მედია მახათას მთაზე გამართულ საჯარო ღონისძიებაზე არ მიიწვია. მედიის პროტესტის საპასუხოდ, ქართულმა ოცნებამ კრიტიკულ არხებთან კომუნიკაცია შეწყვიტა. 22 ივლისს კი, ვიცე-პრემიერმა და კულტურის მინისტრმა, თეა წულუკიანმა მთავარი არხის ჟურნალისტს, ემა გოგოხიას მიკროფონი წაართვა. კვლავ უცნობია, დაიწყო თუ არა შსს-მ ამ ფაქტზე გამოძიება.