პროკურატურის ინფორმაციით, პირი 10 წლის ბავშვს სოციალური ქსელის საშუალებით თანატოლ გოგოდ გაეცნო და პირადი საიდუმლოს ამსახველი ინტიმური ხასიათის მიმოწერა, ფოტო და ვიდეო ფაილები მოიპოვა და ამის გავრცელებით დაემუქრა. უწყების ცნობით, ბრალდებულმა არასრულწლოვანს ვიდეოზარით დარეკვა და სექსუალური ხასიათის ქმედებების შესრულება მოსთხოვა.

პროკურატურაში ამბობენ, რომ ბრალდებული ბავშვს 2020 წლის 10 ივნისს გაეცნო, სამართალდამცავებმა ის 2020 წლის16 ივნისს დააკავეს.

უწყების ცნობით, მას ბრალდება სისხლის სამართლის კოდექსის 1571-ე მუხლის პირველი ნაწილით, 141-ე მუხლის მე-2 ნაწილის "ვ" ქვეპუნქტით და 139-ე მუხლის მე-4 ნაწილის "ბ" ქვეპუნქტით წარედგინა, რაც გულისხმობს პირადი ცხოვრების საიდუმლოს ხელყოფას, პირადი ცხოვრების საიდუმლოს უკანონოდ მოპოვებას, შენახვას, გამოყენებას, ძალადობის გარეშე სრულწლოვანის გარყვნილ ქმედებას დამნაშავისთვის წინასწარი შეცნობით თოთხმეტი წლის ასაკს მიუღწეველთან, სექსუალური ხასიათის სხვაგვარი ქმედების იძულებას წინასწარი შეცნობით არასრულწლოვნის მიმართ.

გორის რაიონულმა სასამართლომ კი მას სასჯელის სახედ და ზომად 12 წლით თავისუფლების აღკვეთა განუსაზღვრა.