თეა წულუკიანმა პოეტ რეზო ამაშუკელს, რომელიც აქტიურად აკეთებს ჰომოფობიურ, ქსენოფობიურ, სექსისტურ და სიძულვილის ენის შემცველ განცხადებებს, დაბადების დღე პირადად მიულოცა. კულტურის მინისტრი ამაშუკელს სახლში ეწვია და როგორც სამინისტროს მიერ გავრცელებულ განცხადებაშია აღნიშნული, უწყების სახელით ჯანმრთელობა, დღეგრძელობა და წარმატებები უსურვა. საქართველოს კი წულუკიანმა ამაშუკელისნაირი "კარგი მამულიშვილები" უსურვა.

"მოხარული ვარ, რომ მომეცა მასთან შეხვედრის შესაძლებლობა, მიუხედავად იმ რთული ჟამისა, რომელიც უდგას მსოფლიოს, ქვეყანას, პანდემიის სახით. საჯაროდაც მინდა მას ვუსურვო ჯანმრთელობა, დღეგრძელობა და ის მუხლჩაუხრელი ბრძოლა უკეთესი საქართველოსთვის, რომელსაც მუდამ ემსახურებოდა არამხოლოდ შემოქმედებით, პოეზიით, არამედ, საზოგადო მოღვაწეობითაც. ასევე, მინდა საქართველოს ვუსურვო მისნაირი კარგი მამულიშვილები", — ამბობს წულუკიანი.

სამინისტროს მიერ გავრცელებულ რელიზში ჩამოთვლილია ამაშუკელის პოეტური კრებულები, ასევე, სამუშაო გამოცდილება და მითითებულია, რომ "ამავდროულად, პოეტი ყოველთვის დაკავებულია საზოგადოებრივი მოღვაწეობით".