On.ge-ს ვიზუალით გავრცელებულ NCDC-ის დირექტორის მოადგილის, პაატა იმნაძის ყალბ ციტატას ქართული ოცნების დეპუტატი, დავით სერგეენკოც გამოეხმაურა. პლენარულ სხდომაზე სიტყვით გამოსვლისას სერგეენკომ აღნიშნა, რომ ეს სიცრუეა და ნიღაბი ჰაერ-წვეთოვანი ინფექციის წინააღმდეგ თავდაცვის ერთ-ერთი ძლიერი საშუალებაა.

სერგეენკომ თქვა ისიც, რომ ინფორმაცია მედიაში გავრცელდა, რაც ასევე არ შეესაბამება სიმართლეს. იმნაძის მსგავსი ციტატა On.ge-ზე არ გამოქვეყნებულა, ყალბი ამბისთვის სანდოობის მინიჭების მიზნით გამოყენებული იყო ჩვენი ვებგვერდის ვიზუალი, ლოგო და შრიფტი.

"ცოტა ხსნის წინ გავრცელდა მედიაში ასეთი ინფო, რომ თითქოს პაატა იმნაძემ თქვა, რომ ნიღბის ტარება კიდევ უფრო მავნებელია, რადგანაც გროვდება შიგნით ვირუსი და აფრქვევს და ა.შ. არც გამახსენდებოდა ეს, უბრალოდ ჩემმა კოლეგამ გაიხსენა თავის კითხვაში, ცალსახად და დადასტურებულად გეუბნებით, რომ ეს არის ფეიკი, ტყუილი ინფორმაცია.

იმ მედია, არ ვიცი, კომპანიამ რაღაცა სხვა თემა უნდა მოიფიქროს, ალბათ, ასეთი მავნებლური რაღაც თითლიბაზობების გავრცელების მაგივრად. ეს ტყუილია, არ შეესაბამება რეალობას", — განაცხადა სერგეენკომ.

On.ge ცდილობს სერგეენკოსთან დაკავშირებას, თუმცა ის სატელეფონო ზარებს არ პასუხობს.

ეს ყალბი ციტატა Facebook-მა ცრუ ინფორმაციად მონიშნა. პაატა იმნაძის იდენტური ან მსგავსი შინაარსის განცხადება არც სხვა ღია წყაროებში იძებნება.

მითების დეტექტორმა On.ge-ის ლოგოთი გავრცელებული სხვა გაყალბებული ციტატები და ინფორმაციები არა ერთხელ გადაამოწმა:

ამ თემაზე On.ge-ც წერდა, როცა ჩვენს ვიზუალთან მიახლოებული სქრინებით გავრცელებული ყალბი ამბები სახალხო დამცველის წინააღმდეგ დისკრედიტაციის კამპანიაში გადაიზარდა.

წინა შემთხვევებისგან განსხვავებით, ამჯერად ვიზუალური მახასიათებლები, კერძოდ, ლოგო, შრიფტი და კატეგორიები მაქსიმალურად იყო მიმსგავსებული ჩვენს ვიზუალზე.