ნიკა გვარამია ბრიფინგი გამართა. მან აქცია დააანონსა, რომელიც უზენაესი სასამართლოს წინ ხვალ პირველის ნახევარზე დაიწყება. რუსთავი 2-ის გენერალური დირექტორის თქმით, აქციიდან იქნება უწყვეტი ეთერი, საღამომდე. აქციები გაიმართება ყოველდღე, მანამ, სანამ უზენაესი სასამართლო გადაწყვეტილებას არ გამოიტანს.

გვარამიას თქმით, უზენაესი სასამართლოს დიდი პალატა, რომელიც ხვალ რუსთავი 2-ის საქმეზე გადაწყვეტილებას გამოაცხადებს, ხვალ გადაწყვეტს ქვეყნის მომავალს - გაწევრიანდება თუ არა ის ევროატლანტიკურ სივრცეში თუ დაბრუნდება საბჭოთა კავშირში:

"ხვალ უზენაესი სასამართლო გადაწყვეტს იქნება თუ არა საქართველოში სიტყვის თავისუფლება, ქვეყნის მომავალს, აქვს თუ არა მას განვითარების შანსი, ხვალ უზენაესი სასამართლო გადაწყვეტს საკუთარ ბედსაც".

ნიკა გვარამიას თქმით, თუ მოსამართლეები რუსთავი 2-ს ქიბარ ხალვაშს მიაკუთვნებენ, ამით ისინი საკუთარი კარიერის თვითლიკვიდაციას მოაწერენ ხელს.

გვარამია აცხადებს, რომ ამ პროცესის განმავლობაში, რუსთავი 2 უთანასწორ ბრძოლაში იმყოფებოდა ხელისუფლებასთან და ბიძინა ივანიშვილთან.

გვარამიას თქმით, აქციაზე რუსთავი 2-ის უამრავი სახე იქნება, თუმცა არა ყველა, რადგან "არხს შიგნიდან გამაგრება" დასჭირდება.