ახლადდარჩეული პარლამენტის თავმჯდომარე კახა კუჭავა მართლმადიდებელი ეკლესიის პატრიარქს ეწვია. საპატრიარქოს პრესსამსახურის ინფორმაციით, შეხვედრა გაცნობითი ხასიათის იყო და ილია მეორემ კუჭავა დალოცა და ქვეყნის სასიკეთოდ ნაყოფიერი საქმიანობა უსურვა.

შეხვედრას ასევე ესწრებოდნენ საპატრიარქო ტახტის მოსაყდრე შიო მუჯირი, თბილისის სასულიერო აკადემიისა და სემინარიის რექტორი, პროტოპრესვიტერი გიორგი ზვიადაძე და საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე.

86 ხმა 6-ის წინააღმდეგ — კახა კუჭავა პარლამენტის თავმჯდომარედ დაამტკიცეს. მას ქართული ოცნების, ასევე, მოქალაქეებისა და ევროპელი სოციალისტების მხარდაჭერა ჰქონდა. თავი შეიკავეს გირჩის წევრებმა. კენჭისყრის შედეგების მიხედვით, სავარაუდოა, რომ ოპოზიციის სხვა ნაწილმაც კუჭავას მხარი დაუჭირა.

პარლამენტის თავმჯდომარეობის კანდიდატად ქართულმა ოცნებამ კახა კუჭავა მას შემდეგ წარადგინა, რაც არჩილ თალაკვაძემ თანამდებობა დატოვა.

თალაკვაძემ წასვლის მიზეზად ის დაასახელა, რომ აქტიურად იყო ჩართული მოლაპარაკებების პროცესში როგორც მხარე, პარლამენტის თავმჯდომარე კი მიუკერძოებელი უნდა იყოს. კობახიძემ ხაზი გაუსვა იმ ფაქტს, რომ თალაკვაძემ ეს გადაწყვეტილება თავად მიიღო.