ეკონომიკის მინისტრი, ნათია თურნავა რიყის დოქებისა და სხვა ობიექტების ამ დრომდე ვერ გაყიდვას წინა ხელისუფლების დროს საბაზრო მოთხოვნებისთვის შეუსაბამო თანხების გადახდით ხსნის.

"ვერ დაგეთანხმებით, რომ ობიექტები არ იყიდება. პირველ აუქციონზე 109 ობიექტი გაიყიდა... თუმცა, გვაქვს ჩვენ გარკვეული ობიექტები, რომელიც თავის დროზე წინა ხელისუფლების დროს არის აშენებული და არარეალურად მაღალი, გაბერილი თანხები არის დახარჯული ამ ობიექტების შექმნაში. აქედან გამომდინარე, ჩვენ კანონმდებლობით ვალდებულები ვართ, საწყისი ღირებულება დავიწყოთ იმ საბალანსო ღირებულებიდან, რაც თავის დროზე ის დაჯდა და ეს ხალხის ფული იყო ბიუჯეტიდან გაღებული, მაგრამ მთელი რიგი აუქციონების შემდეგაც, იგივე რიყის დოქები და შეიძლება რამდენიმე სხვა ობიექტიც იყოს ასეთი, რჩება გაუსხვისებელი. იმიტომ, რომ ამთავითვე ჩანს, რომ ის თანხები თავის დროზე საბაზრო მოთხოვნებს არ შეესაბამებოდა. აქედან გამომდინარე, ჩვენ თამამად ვივლით ამ მიმართულებით და თუ ვხედავთ, რომ თანხა არის არერეალური, გადავხედავთ ამ თანხებს. ჩვენ, სხვათა შორის, ეს ნაბიჯი გადავდგით მთელ რიგ ობიექტებთან დაკავშირებით", — განაცხადა თურნავამ.

აუქციონზე გასული ე.წ. რიყის დოქები მესამე მცდელობაზეც ვერ გაიყიდა. პირველი აუქციონისგან განსხვავებით, საწყისი ღირებულა ამჯერადაც 23 750 000 ლარით ნაკლები იყო და 71 250 000 ლარს შეადგენდა. აუქციონი 30 მარტს გამოცხადდა და13 აპრილს ისევ უშედეგოდ დასრულდა.

თბილისის ცენტრში მდებარე 14 591მ2 ფართობის მიწის ნაკვეთი და მასზე განთავსებული უნიკალურ არქიტექტურული ნიმუში სახელმწიფოს ბალანსზეა. მიწისა და ნაგებობის გაყიდვა გასული წლის დასაწყისში 95 000 000 ლარად სცადეს, თუმცა აუქციონი ისე დასრულდა, რომ მისი ყიდვის სურვილი არავინ გამოთქვა.

რიყის დოქების გაყიდვას ეჭვობდა თბილისის მერი კახა კალაძეც. კალაძე ამბობდა, რომ ნაგებობა 1 ლარად ვერ გაიყიდა და საეჭვოა, რომ 95 მილიონად გაიყიდოს.

აუქციონის პირობების თანახმად, ყიდვიდან სამი წლის ვადაში ინვესტორმა მრავალფუნქციური კომპლექსი უნდა შექმნას, რისთვისაც არანაკლებ 10 000 000 ლარის ინვესტიცია უნდა განახორციელოს.