ბიზნესმენმა კლიმენტი კეკუტიამ, რომლის ჩასვლამაც სალხინოს მონასტერში დღეს ფიზიკური და სიტყვიერი დაპირისპირება გამოიწვია, განაცხადა, რომ ადგილზე დაპირისპირება არ შეუმჩნევია.

"პროტესტს სად ხედავთ, ჩემი მოსვლის შემდეგ ამდენი ხალხი თუ შეიკრიბა, დიდება უფალს, მადლობელი ვარ. [...] მე ღმერთს ვუცხადებ-მეთქი [მხარდაჭერას], ერთხელ ვთქვი, ორჯერ ვთქვი და კიდევ გავიმეორებ. მე ვარ იქ, სადაც არის ღმერთი, სადაც არის სიყვარული, ეგ არის ჩემი დოგმა და ზომა ცხოვრების, სხვა არაფერი გამაჩნია", — განაცხადა კეკუტიამ.

მისივე თქმით, ინფორმაცია ეკლესიაში ფინანსური ინტერესების შესახებ "სრული სიცრუეა".

"აბსოლუტურად სიცრუეა, კიდე შემიძლია დავამატო, რომ თუ რაც არის, კიდევ ჩემი შეწირულია, სიმართლე გითხრათ, ეგრე უთხარით, ვინც მე ამას მაბრალებს", — განაცხადა მან.

დღეს სალხინოს მამათა მონასტერში რამდენიმეჯერ მოხდა დაპირისპირება. პირველად მაშინ, როცა იქ მეუფე სტეფანეს მხარდამჭერი ბიზნესმენი, კლიმენტი კეკუტია გამოჩნდა. მეორე დაპირისპირება თავად მეუფე სტეფანეს გამოჩენას მოჰყვა.