20 ივნისს დაშავებული მოქალაქეები და მათი ოჯახის წევრები აცხადებენ, რომ ამნისტიის შესახებ კანონი მათთვის მიუღებელია, ამიტომ სამშაბათს, როცა პარლამენტი კანონის განხილვას დაიწყებს, აქცია დააანონსეს.

"ჩვენთვის, ანტისაოკუპაციო, მშვიდობიან აქციაზე დაზარალებული დემონსტრანტებისა და მათი ოჯახის წევრებისთვის პრინციპულად მიუღებელია, რომ სამშაბათს მოხდეს მიღება და ინპლემენტირება ამნისტიის კანონის, რომელიც გათვალისწინებულია მედიაციის შედეგად მიღებული დოკუმენტით.

ჩვენი აზრით, ეს კანონი არის როგორც საერთაშორისო, ისე ადგილობრივი სამართლებრივი პრინციპების დარღვევა. ჩვენთვის მიუღებელია, რომ რომელიმე პოლიტიკურ ძალას ქვეყნის შიგნით ან გარეთ ჰქონდეს იმის საშუალება ან სამართლებრივი, პოლიტიკური და მორალური უფლება, რომ გადაწყვიტოს ის საკითხები, რომლებიც ეხება ჩვენს ფუნდამენტურ უფლებებს", — განაცხადა აქტივისტმა, ირაკლი ფავლენიშვილმა.

გიორგი სულაშვილმა, რომელმაც 20 ივნისის აქციის დაშლისას თვალი დაკარგა, პოლიტიკურ პარტიებს თავშეკავებისკენ მოუწოდა. მისი თქმით, ისინი ფიქრობენ, რომ ქვეყნის სასიკეთო საქმეს აკეთებენ, თუმცა ცდებიან.

"ნუ ჩაგვაფურთხებთ სულში, იმიტომ რომ, სულში ჩაფურთხებული დარჩებით ბოლოს თქვენ. ვინ გასცემს პასუხს ლეთოდიანს, მაკო გომურს და დავით ქურდოვანიძეს. რატომ გვესროლოს, რატომ გაგვიმეტეს ასე ქართველები", — განაცხადა მან.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა ვკითხულობთ, რომ მხარეებმა ხელმოწერიდან ერთი კვირის ვადაში, რეაგირება უნდა მოახდინონ "პოლიტიზებულ მართლმსაჯულებად" აღქმულ ორ საკითხზე, ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს.

გაიგეთ მეტი: