ლელოს ლიდერებმა ბრიუსელში ვიზიტისას ევროპარლამენტარებს შესთავაზეს, რომ თავდებში დაუდგნენ ნაციონალური მოძრაობის თავმჯდომარეს, ნიკა მელიას. ამის შესახებ ინფორმაცია პარტიის ლიდერის, მამუკა ხაზარაძის ფეისბუქგვერდზე ვრცელდება.

"სამუშაო შეხვედრებზე განხილული ეს წინადადება ევროპარლამენტარების მხრიდან დადებითად იქნა მიღებული. შესაბამისად, ევროპელი პარლამენტარები მზად არიან ჩაერთონ ამ ინიციატივაში და თავდებში დაუდგნენ ნიკა მელიას", — ვკითხულობთ განცხადებაში.

პარტია მზადაა, შეუერთდეს ევროპარლამენტარებს და თავადაც გახდეს ნიკა მელიას თავდები.

"იმედი გვაქვს, რომ ამ ინიციატივას ასევე დადებითად მიიღებს საქართველოს ხელისუფლება და დროულ რეაგირებას მოახდენენ შესაბამისი უწყებები, ვისაც გააჩნია საკითხის გადაწყვეტის უფლებამოსილება", — აცხადებენ ლელოში.

ლელოში აცხადებენ, რომ მელიას საკითხის გარდა, ბრიუსელში შეთანხმდნენ ევროპელი დეპუტატების მონიტორინგის ჯგუფის შექმნაზე. პარტიის ინფორმაციით, ჯგუფი ევროპული საბჭოს პრეზიდენტის, შარლ მიშელის შეთანხმების აღსრულებას გაუწევს მონიტორინგს.

გარდა ამისა, ბრიუსელში გახმოვანდა ინიციატივა ევროკავშირის წევრობისთვის საგზაო რუკის შექმნის შესახებ.

"ეს იქნება წინ გადადგმული უზარმაზარი ნაბიჯი და ის გულისხმობს შუალედურ სტატუსს ევროკავშირის წევრობისთვის, რომელიც შესაძლებელია მიენიჭოს საქართველოს", — აცხადებენ პარტიაში.

ლელოს ლიდერებმა, მამუკა ხაზარაძემ, ბადრი ჯაფარიძემ და გრიგოლ გეგელიამ საქმიანი ვიზიტით ბრისუელში გამგზავრება 16 აპრილს დააანონსეს. მოგვიანებით, ევროპული საბჭოს პრეზიდენტის, შარლ მიშელის საქართველოში ჩამოსვლის გამო გამგზავრება ერთი დღით გადადეს.