ევროპული საქართველოს ერთ-ერთი წარმომადგენელი, ლელა ქებურია აცხადებს, რომ ოპოზიციის მიერ პოლიტიკოს გოგი წულაიაზე გავრცელებულ განცხადებაში არ ჩანს ეჭვები მომჩივნის მიმართ, უბრალოდ საუბარია შესაძლო ორმაგი სტანდარტების გამოყენებასთან. ამის შესახებ ქებურიამ On.ge-ს განუცხადა.

"ამ განცხადებაში, ჩემი აზრით, ქალთა მიმართ ძალადობაზე აქცენტი საერთოდ არ არის და პირიქით, ხაზგასმულია, რომ ქალთა მიმართ ძალადობის მიმართ ჩვენ ვართ ძალიან სენსიტიურები, ძალიან მკაცრები და აქ ისიც არის მითითებული, რომ აბსოლუტურად ეჭვქვეშ არ ვაყენებთ მომჩივანს. აქ საუბარია უბრალოდ ხომ არ არის ეჭვი იმასთან დაკავშირებით, რომ ეს არის შერჩევითი სამართალი, მაშინ, როდესაც უკვე რამდენი ხანი გავიდა მას შემდეგ, რაც ბერას ჩანაწერები გავიდა და ამ მიმართულებით აბსოლუტურად არაფერი არ გაკეთებულა გარდა იმისა, რომ პროკურატურამ რაღაც აბსურდული მოტივით სცადა TV პირველში შეჭრა. მეორე რაც იყო, იყო ის, რომ გოგი წულაიას დაკავება მოხდა საკმაოდ მძიმე ბრალდებით, თუმცა აქაც თუ გადავხედავთ პრაქტიკას, წინასწარ პატიმრობა, ანუ წინასწარ აღკვეთის ღონისძიებად თითქმის არ გამოყენებულა", — აცხადებს ქებურია.

მისივე თქმით, განცხადებაში არ იყო აქცენტი ქალთა მიმართ ძალადობაზე, არამედ იმაზე, რომ შეიძლება იკვეთებოდეს კონკრეტული პოლიტიკოსის მიმართ შერჩევითი სამართლის ნიშნები.

"აქ საუბარია იმაზე, ხომ არ არის კონკრეტული პოლიტიკოსის მიმართ შერჩევითი სამართლის ნიშნები. ამაზეა უბრალოდ საუბარი და რომ ბიძინა ივანიშვილს შეუძლია ნებისმიერი მისთვის არასასურველი პიროვნების მიმართ პროკურატურაც და სასამართლოც გამოიყენოს თავისი ოჯახის ინტერესების დასაცავად თორემ ქალთა მიმართ ძალადობაზე აბსოლუტურად აქცენტიც კი არ არის ამ განცხადებაში, ამიტომ მე მასში ვერ ვხედავ ისეთ ნიშნებს, რომ ქალთა მიმართ ძალადობაში რაიმე ტიპის ეჭვები და კითხვები არსებობდეს ამ განცხადების გამავრცელებლების მიმართ. ჩემი აზრით, ამ განცხადებაზე ამ ტიპის აქცენტის გაკეთება არასწორია", — განაცხადა ქებურიამ.

ოპოზიციის წარმომადგენლებმა გოგი წულაიას მხარდასაჭერი განცხადება გაავრცელეს. მათი თქმით, ისინი სერიოზულად უდგებიან ნებისმიერ ბრალდებას ქალთა მიმართ ძალადობის შესახებ და არ აპირებენ ავტომატურად ეჭვქვეშ დააყენონ მომჩივანის მიერ გამოთქმული ბრალდებები, თუმცა წულაიასთვის აღმკვეთი ღონისძიების შეფარდება ხელისუფლების პოლიტიკურ მოტივზე მიუთითებს, ვინაიდან ანალოგიური ბრალდებების დროს აღმკვეთი ღონისძიების ეს ფორმა არ გამოიყენება.

საერთო განცხადება ერვროპული საქართველოს პრესსამსახურმა გაავრცელა. ხელმომწერთა შორის იყო ლელოც.

აღსანიშნავია, რომ ამ განცხადებას გაემიჯნენ ნაციონალური მოძრაობის წევრი, ხატია დეკანოიძე და სტრატეგია აღმაშენებლის წევრი თეონა ჭალიძე.

წულაია 17 მარტს ქალზე ფიზიკური ძალადობის ბრალდებით დააკავეს. თბილისის საქალაქო სასამართლომ მას აღკვეთის ღონისძიების სახით პატიმრობა შეუფარდა.

წულაიას თავდაპირველად ბრალი ძალადობის მუხლით წარუდგინეს, შემდეგ კი დაუმძიმეს და ამჟამად ის ბრალდებულია საქართველოს სისხლის სამართლის კოდექსის 138-ე მუხლის პირველი ნაწილით, რაც ძალადობით ჩანდენილი სექსუალური ხასიათის სხვაგვარ ქმედებას გულისხმობს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს.

ქალი, რომელზე ძალადობაც ბრალდება წულაიას On.ge-სთან საუბარში ამბობს, რომ ყოფილმა დეპუტატმა მასზე სექსუალურად ძალადობა სცადა, წინააღმდეგობის გაწევის დროს კი დაზიანებები მიიღო. იგი უკან დახევას არ აპირებს და შემთხვევისთვის სამართლებრივი შეფასების მისაცემად საკითხს ბოლომდე მიიყვანს.

"ჯოჯოხეთს გავდივარ ახლა. ღმერთმა ყველა დაიფაროს ამისგან. ამიტომ არაფრით არ ვაპატიებ. ჩემ უკან სხვა ქალებიც დგანან, გოგოს მშობელიც ვარ მეც და ამიტომ ბოლომდე გავყვები ამ ამბავს. არავის ვუსურვებ ძალადობის მსხვერპლი გახდეს და ის ჯოჯოხეთის გაიაროს, რასაც მე ამ წამს გავდივარ", — ამბობს ასმათ დვალიშვილი.

გოგი წულაია მე-6 მოწვევის პარლამენტის წევრი იყო. 2019 წელს ის ზესტაფონის მერობის კანდიდატად იყრიდა კენჭს. მარტის დასაწყისში მან პარტია თავისუფალი საქართველო დატოვა.