ლელოს ერთ-ერთი წარმომადგენელი, ლანა გალდავა აცხადებს, რომ გმობს ყველნაირ ძალადობას ქალთა მიმართ, თუმცა, ასევე, არასდროს დააზიანებს უდანაშაულობის პრეზუმფციის არსს. ამის შესახებ მან On.ge-ს განუცხადა.

"რაც შეეხება გოგი წულაიას საკითხს, რა თქმა უნდა, ყველანაირ ძალადობას ვგმობ ქალთა მიმართ, ამავდროულად, არასოდეს, როგორც იურისტი არ დავაზიანებ უდანაშაულობის პრეზუმფციის არსს. ამ საკითხზე არის ჩასატარებელი ობიექტური გამოძიება. ობიექტური მართლმსაჯულების შედეგი უნდა დადგეს, მაგრამ ეჭვს მიჩენს უშუალოდ ეს ფაქტი, რადგან ძალიან მალე ბერა ივანიშვილის საჯაროდ შეგინებიდან მოხდა ეს ამბავი, დაკავების ფაქტი. მე ახლა როგორც იურისტი, მაინტერესებს, მსგავს დანაშაულებზე, ამას იმიტომ ვამბობ, რომ ჯერ არ ვიცით დამნაშავეა თუ არა ეს ადამიანი, მაინტერესებს სხვა შემთხევებში აღკვეთის ღონისძიებად პატიმრობას იყენებენ? ეს საკითხი უკვე არის შესამოწმებელი, გადასამოწმებელი და სხვა შემთხვევაში თუ პატიმრობას არ იყენებენ, ხომ არ გამოდის ორმაგი სტანდარტი? სხვა მხრივ, ქალთა მიმართ ძალადობა აუცილებლად დასაგმობია, აუცილებლად მძიმე დანაშაულია", — განაცხადა ლანა გალდავამ.

რაც შეეხება ლელოს ხელმოწერას საერთო ოპოზიციურ განცხადებაზე წულაიასთან დაკავშირებით, ის აცხადებს, რომ პარტიაში ამ საკითხზე მსჯელობა არ ყოფილა, შესაბამისად, ფიზიკურად ვერ იქნებოდა ეს ხელმოწერა.

"მე ძალიან გამიკვირდა, როდესაც ვნახე [ოპოზიციის განცხადება] იმიტომ, რომ ჩვენ ზოგადად გოგი წულაიას საკითხზე არ გვიმსჯელია პარტიაში და შესაბამისად, ეს ხელმოწერა იქ ფიზიკურად ვერ იქნებოდა იმიტომ, რომ საკთხზე არ იყო ნამსჯელი. ჩვენგან ამ განცხადებაზე ხელი არავის არ მოუწერია. რაც შეეხება თვითონ გოგი წულაიას საკითხს", — აცხადებს გალდავა.

ოპოზიციის წარმომადგენლებმა გოგი წულაიას მხარდასაჭერი განცხადება გაავრცელეს. მათი თქმით, ისინი სერიოზულად უდგებიან ნებისმიერ ბრალდებას ქალთა მიმართ ძალადობის შესახებ და არ აპირებენ ავტომატურად ეჭვქვეშ დააყენონ მომჩივანის მიერ გამოთქმული ბრალდებები, თუმცა წულაიასთვის აღმკვეთი ღონისძიების შეფარდება ხელისუფლების პოლიტიკურ მოტივზე მიუთითებს, ვინაიდან ანალოგიური ბრალდებების დროს აღმკვეთი ღონისძიების ეს ფორმა არ გამოიყენება.

საერთო განცხადება ევროპული საქართველოს პრესსამსახურმა გაავრცელა. ხელმომწერთა შორის იყო ლელოც, თუმცა მოგვიანებით პარტიამ გაავრცელა განცხადება, რომლის მიხედვით, გოგი წულაიას შესახებ ოპოზიციის საერთო განცხადება პარტიაში არ განხილულა და მცდარი ინფორმაცია გავრცელდა.

აღსანიშნავია, რომ ამ განცხადებას გაემიჯნენ ნაციონალური მოძრაობის წევრი, ხატია დეკანოიძე და სტრატეგია აღმაშენებლის წევრი თეონა ჭალიძე.

წულაია 17 მარტს ქალზე ფიზიკური ძალადობის ბრალდებით დააკავეს. თბილისის საქალაქო სასამართლომ მას აღკვეთის ღონისძიების სახით პატიმრობა შეუფარდა.

წულაიას თავდაპირველად ბრალი ძალადობის მუხლით წარუდგინეს, შემდეგ კი დაუმძიმეს და ამჟამად ის ბრალდებულია საქართველოს სისხლის სამართლის კოდექსის 138-ე მუხლის პირველი ნაწილით, რაც ძალადობით ჩანდენილი სექსუალური ხასიათის სხვაგვარ ქმედებას გულისხმობს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს.

ქალი, რომელზე ძალადობაც ბრალდება წულაიას On.ge-სთან საუბარში ამბობს, რომ ყოფილმა დეპუტატმა მასზე სექსუალურად ძალადობა სცადა, წინააღმდეგობის გაწევის დროს კი დაზიანებები მიიღო. იგი უკან დახევას არ აპირებს და შემთხვევისთვის სამართლებრივი შეფასების მისაცემად საკითხს ბოლომდე მიიყვანს.

"ჯოჯოხეთს გავდივარ ახლა. ღმერთმა ყველა დაიფაროს ამისგან. ამიტომ არაფრით არ ვაპატიებ. ჩემ უკან სხვა ქალებიც დგანან, გოგოს მშობელიც ვარ მეც და ამიტომ ბოლომდე გავყვები ამ ამბავს. არავის ვუსურვებ ძალადობის მსხვერპლი გახდეს და ის ჯოჯოხეთის გაიაროს, რასაც მე ამ წამს გავდივარ", — ამბობს ასმათ დვალიშვილი.

გოგი წულაია მე-6 მოწვევის პარლამენტის წევრი იყო. 2019 წელს ის ზესტაფონის მერობის კანდიდატად იყრიდა კენჭს. მარტის დასაწყისში მან პარტია თავისუფალი საქართველო დატოვა. მას შემდეგ, რაც TV პირველმა გაავრცელა ჩანაწერები, სადაც ისმის, რომ ბერა ივანიშვილი და ირაკლი ღარიბაშვილი სავარაუდოდ, "სჯიან" ადამიანებს, რომლებიც ბერას აგინებენ, გოგი წულაიამ მას უხმოდ, ხელების მოძრაობებით აგინა.