კოალიცია მედიის ადვოკატირებისთვის განცხადებით, შინაგან საქმეთა სამინისტრო ჟურნალისტებს ნამახვანში წასვლისა და მუშაობის უფლებას არ აძლევს. მათი თქმით, ამ დრომდე უცნობია პროფესიული საქმიანობის შეზღუდვის მიზეზები.

კოალიცია აღნიშნავს, რომ კრიზისულ სიტუაციაში გადამწყვეტად მიაჩნიათ, ჟურნალისტებს მიეცეთ შესაძლებლობა თავისუფლად ასახონ განვითარებული მოვლენები, საზოგადოებას კი შეუნარჩუნდეს უფლება მიიღოს სრული ინფორმაცია ნამოხვანში მიმდინარე პროცესებზე.

"ჩვენთვის ამ დრომდე უცნობია ჟურნალისტებისათვის პროფესიული საქმიანობის შეზღუდვის მიზეზები. კოალიცია მედიის ადვოკატირებისათვის წევრი ორგანიზაციები მოუწოდებენ შინაგან საქმეთა სამინიტროს იმოქმედოს ნამოხვანში მიმდინარე პროცესების მიმართ მაღალი საჯარო ინტერესის გათვალისწინებით", — ნათქვამია განცხადებაში.

გუშინ, 10 აპრილს რიონში კაცი გაუჩინარდა. მდინარე რიონში კაცს ამ დრომდე ეძებენ. როგორც შინაგან საქმეთა სამინისტროში On.ge-ის უთხრეს, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

შინაგან საქმეთა სამინისტომ სოფელ ნამახვანიში გაშლილი საპროტესტო კარვები დაშალა და ეს რიონის წყლის დონის მატების გამო აქციის მონაწილეთა სიცოცხლისა და ჯანმრთელობის დაცვის მოტივით ახსნა. აქტივისტი, ვარლამ გოლეთიანი აცხადებს, რომ წყლის დონის მატებასთან კარვების დაშლა არაფერ კავშირშია. მისი თქმით, იქ, სადაც კარვებია განთავსებული, წყლის დონე არ იმატებს იმ ზღვრამდე, რომ ამ პროცესს ხელი შეუშალოს.