იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორი, სულხან თამაზაშვილი აცხადებს, რომ სოფელ ნამახვანში საპროტესტო კარვების დაშლის შემდეგ უზრუნველყოფს მათ ტრანსპორტირებას იქ, სადაც აქტივისტები მოისურვებენ პროტესტის გაგრძელებას. თუმცა, თამაზაშვილი განმარტავს, რომ "სპეციალური საპოლიციო ღონისძიებების" გამო აქცია ნამახვანში ჯერჯერობით ვეღარ გაგრძელდებოდა.

"ნამახვანიდან ეს კარვები ავიღეთ. ამ კარვებს თავის ინვენტართან ერთად, ყველაფერთან, რაც არის გადმოგცემთ თქვენ, ორგანიზატორებს. უზრუნველვყობთ ჩვენ ამის ტრანსპორტირებას და იმ ადგილას მოვიტანთ, სადაც გააგრძელებთ პროტესტს [...]

ნამახვანის ხეობაში, სრულიად ლეგიტიმურად, მიმდინარეობს სპეციალური საპოლიციო ღონისძიებები, რომელიც დროებით ზღუდავს მოქალაქეების აქციის ფარგლებში გადაადგილებას. არ არის შეზღუდული ადგილობრივი მაცხოვრებლების მოძრაობა", — უთხრა აქციების ორგანიზატორებს თამაზაშვილმა.

აქტივისტებს უნდათ კარვები ისევ სოფელ ნამახვანში, ოღონდ სხვა ადგილას, ამჯერად მდინარისგან მოშორებით გაშალონ.

"ჩვენ ნამოხვანში გვაქვს კერძო საკუთრებაში არსებული მიწა, რომელიც გზის მოპირდაპირე მხარეს მდებარეობს და შესაბამისად, რიონის წყლის ადიდების შემთხვევაშიც კი, რომელიც, რა თქმა უნდა, არც არსებულ ლოკაციაზე ქმნის რეალურ პრობლემებს, თუმცა, მივყვებით რა უსაფრთხოების ნორმებს და განცხადებებს, გვაქვს ალტერნატიული ლოკაცია, სადაც ლეგიტიმურად გვაქვს უფლება, რომ გავშალოთ კარვები. სულხანმა [თამაზაშვილმა] არ დაგვიდასტურა, რომ ის ამას ეთანხმება და ამით, პრინციპში გვითრხა, რომ გამოდევნილები ვართ ნამოხვანიდან", — განაცხადა აქტივისტმა მირზა ნოაზაძემ.

შინაგან საქმეთა სამინისტომ სოფელ ნამახვანიში გაშლილი საპროტესტო კარვები დაშალა და ეს რიონის წყლის დონის მატების გამო აქციის მონაწილეთა სიცოცხლისა და ჯანმრთელობის დაცვის მოტივით ახსნა. აქტივისტი, ვარლამ გოლეთიანი აცხადებს, რომ წყლის დონის მატებასთან კარვების დაშლა არაფერ კავშირშია. მისი თქმით, იქ, სადაც კარვებია განთავსებული, წყლის დონე არ იმატებს იმ ზღვრამდე, რომ ამ პროცესს ხელი შეუშალოს.

აქტივისტებმა პოლიციელებს სთხოვეს ნივთების შესაგროვებლად და კარვებიდან გასატანად დრო მიეცათ, თუმცა სამართალდამცავებმა უთხრეს, რომ დაშლა დროულად უნდა დაეწყოთ. ისინი ადგილიდან ფეისბუქ-ლაივით ერთვებოდნენ, სადაც ჩანს, რომ მათ პირადი ნივთები გამოაქვთ კარვებიდან. სწორედ ამ პროცესში შეამჩნიეს მათ არყისა და ლუდის ბოთლები. ისინი ამბობენ, რომ ალკოჰოლული სასმელი არ ჰქონდათ და ცარიელი ბოთლები "პოლიციელებმა ჩაუდეს". აქტივისტები ამას პროტესტის დისკრედიტაციის მცდელობად აფასებენ და ალკოტესტის ჩატარებას ითხოვენ, რათა დადასტურდეს, რომ სასმელს თავად არ მოიხმარდნენ.