ჯანდაცვის მინისტრის მოადგილის, თამარ გაბუნიას განცხადებით, ვაქცინაციის მსურველ მოქალაქეთა რაოდენობა ყოველდღიურად იზრდება. მისივე თქმით, 9 აპრილის დილის მონაცემებით, ჯამურად 18 000-მდე მოქალაქეა აცრილი.

"1 500-ს გადააჭარბა ყოველდღიურად ჩატარებული აცრების რაოდენობამ. ჯამურად დილის მონაცემებით, აცრილია 18 000-მდე მოქალაქე და პროცესი გაგრძელდება", — განაცხადა გაბუნიამ.

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, აქედან 7 210 ადამიანი ფაიზერის ვაქცინით აიცრა, ხოლო დანარჩენი 10 000-ზე მეტი ასტრაზენეკათი. მისივე თქმით, დაჯავშნილია 18 000-მდე აცრა.

დღესვე გახდა ცნობილი, რომ უწყებათაშორისი საკოორდინაციო საბჭოს გადაწყვეტილებით, 4-11 მაისი საქართველოს მასშტაბით უქმე დღეებად ცხადდება. ამასთან, საქართველოს მთავრობამ დამსაქმებლებს თანამშრომელთა დისტანციურ სამუშაო რეჟიმში გადაყვანის რეკომენდაციით მიმართა.