საკოორდინაციო საბჭო დამსაქმებლებს თანამშრომელთა დისტანციურ სამუშაო რეჟიმში გადაყვანის რეკომენდაციით მიმართავს. ეს საკითხი საბჭომ დღეს, ვიდეოკონფერენციის ფორმატში ჩატარებულ სხდომაზე განიხილა, მიზეზად კი ეპიდემიოლოგიური მდგომარეობის გაუარესება დაასახელა.

"ქვეყანაში დაფიქსირებული შემთხვევების მატების დინამიკა საყურადღებოა და როგორც ხელისუფლების, ისე მოქალაქეების მხრიდან განსაკუთრებული პასუხისმგებლობით მიდგომას მოითხოვს", — ვკითხულობთ მთავრობის ადმინისტრაციის მიერ გავრცელებულ განცხადებაში.

რეკომენდაცია ეხება როგორც საჯარო, ისე კერძო სექტორს.

ამავე სხდომაზე საბჭომ გადაწყვიტა, რომ 4-11 მაისი ქვეყნის მასშტაბით უქმე დღეებად გამოცხადდეს.