ქუთაისელმა ელექტრიკოსმა საწარმოო ტრავმვის მიღებიდან 32 წლის შემდეგ სასამართლო მოიგო. დაზარალებულის ინტერესებს საქართველოს ახალგაზრდა იურისტთა ასოციაციის ქუთაისის ფილიალი იცავდა.

საიას ცნობით, ელექტრომონტიორისთვის, რომელმაც საწარმოო ტრავმა 1989 წელს მიიღო, ყოველთვიური ანაზღაურების გადაანგარიშება ელექტრომონტიორის პოზიციაზე ამჟამინდელი ანაზღაურების შესაბამისად არ ხდებოდა და ყოველთვიურად მხოლოდ 60 ლარს იღებდა.

მან, არასამთავრობო ორგანიზაციის დახმარებით, სასამართლოს მიმართა და როგორც მიუღებელი სარჩოს ანაზღაურება, ასევე, ყოველთვიური სარჩოს შესაბამისი გადაანგარიშება მოითხოვა.

"თბილისის საქალაქო სასამართლოში დავა დაზარალებულის სასარგებლოდ გადაწყდა. მოპასუხე სს საქართველოს სახელმწიფო ელექტროსისტემას დაზარალებულის სასარგებლოდ მიუღებელი სარჩოს — 17 280 ლარის გადახდა დაეკისრა. ასევე, მოპასუხეს დაეკისრა დაზარალებულის საპენსიო ასაკის მიღწევამდე, მისთვის ყოველთვიურად გაზრდილი ოდენობით სარჩოს — 550 ლარის გადახდა", — აცხადებენ საიაში.

საიას ინფორმაციით, პირველი ინსტანციის სასამართლოს გადაწყვეტილება მოპასუხემ ზემდგომი ინსტანციის სასამართლოებში გაასაჩივრა, თუმცა, გადაწყვეტილება არ შეცვლილა და კანონიერ ძალაში შევიდა.