სტრატეგია აღმაშენებლის ლიდერის, გიორგი ვაშაძის თქმით, ქვეყნის დამოუკიდებლობის გზა, რომელიც 30 წლის წინ დაიწყო, ჯერ კიდევ გრძელდება. მისივე განცხადებით, დღეს ქვეყანა ძალიან დიდი გამოწვევების წინაშე დგას.

"პირველ რიგში, გამოვხატოთ მადლიერება ყველა იმ ადამიანთან მიმართებაში, ვინც თავისი წვლილი შეიტანა დამოუკიდებლობისთვის და გილოცავთ 9 აპრილს, იმიტომ რომ ეს არის დღე, როცა აღდგა ჩვენი დამოუკიდებლობა. ეს არის დღე, რომელიც არის სიმბოლო ეროვნული თანხმობის, ერთობის და როცა ერთად ვდგავართ, ჩვენ ყველაფერი შეგვიძლია. შეგვიძლია უძლიერესი სახელმწიფო ავაშენოთ, ვფიქრობ, დამოუკიდებლობის გზა, რომელიც 30 წლის წინ დაიწყო, ჯერ კიდევ გრძელდება, იმიტომ რომ, რეალური თავისუფლება უნდა მოვიპოვოთ. უნდა შევქმნათ და ავაშენოთ ძლიერი სახელმწიფო...

დღეს ქვეყანა ძალიან დიდი გამოწვევების წინაშე დგას. სამწუხაროდ, ერი ისევ გახლეჩილია და ეს დღე უნდა იყოს სიმბოლო, როცა ყველა ერთად ვართ, ერთად დავდგებით და მაქსიმალურად უნდა დავუახლოვოთ ერთმანეთს პოზიციები", — განაცხადა ვაშაძემ.

9 აპრილის ტრაგედიიდან 32 წელი გავიდა. 1989 წლის 4 აპრილს სეპარატიზმისა და მოსკოვის ანტიქართული პოლიტიკის წინააღმდეგ მშვიდობიანი აქციები დაიწყო, რომელიც მალევე დამოუკიდებლობის მოთხოვნაში გადაიზარდა. 9 აპრილს, გამთენიას რუსულმა არმიამ რუსთაველის გამზირზე შეკრებილი ხალხის დარბევა დაიწყო. მშვიდობიან, ხელაწეულ დემონსტრანტებს მომწამლავი ქიმიური საშუალებები, ცეცხლსასროლი იარაღი, სასანგრე ბარები, ჯავშანტრანსპორტიორები და ტანკები დაუპირისპირეს.

სადამსჯელო ღონისძიებებს 21 ადამიანის სიცოცხლე ემსხვერპლა, მათგან 17 ქალია. ქალებს შორის ყველაზე უმცროსები 16 წლის უფროსი კი 70 წლის. იმდროინდელ ბეჭდურ გამოცემებთან ინტერვიუში აქციის მონაწილეები იხსენებენ, რომ ჯარისკაცები ყველაზე აგრესიულები ორსულების და მოხუცების მიმართ იყვნენ.

1991 წლის 9 აპრილს კი, მოსახლეობის ნებაზე დაყრდნობითა და პირველი რესპუბლიკის დამოუკიდებლობის აქტის საფუძველზე უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა და აქტი გამოსცა.

გაიგეთ მეტი: