ევროპული საქართველოს ერთ-ერთი ლიდერის, გიგა ბოკერიას განცხადებით, ყველას მორალური ვალია, 9 აპრილს დაღუპულთა ხსოვნას გავუფრთხილდეთ პირველ რიგში იმით, რომ აღარადროს დავუშვათ, თავისუფლება გარედან ვინმემ წაგვართვას. ამის შესახებ ბოკერიამ 9 აპრილის მემორიალთან ისაუბრა და აღნიშნა, რომ ეს დღე საქართველოს უახლეს ისტორიაში უმნიშვნელოვანესი დღეა.

"ტრაგიკული დღეა, რა თქმა უნდა, პირველ რიგში, იმიტომ რომ ამ დღეს ბოროტების იმპერიის, საბჭოთა კავშირის რეპრესიულმა მანქანამ ჩვენი ადამიანების, ჩვენი მოქალაქეების სიცოცხლე შეიწირა. ამავე დროს, არის ქართული საზოგადოების გამარჯვების დღეც ამ ტრაგედიის ფონზე. ეს არის დღე, როდესაც ქართულმა საზოგადოებამ ძალიან მყარად დააფიქსირა საკუთარი თავისთვის, მთელი მსოფლიოსთვის, რომ არ შეეგუება ამ ბოროტების იმპერიის ან მისი მემკვიდრის, რასაც დღეს პუტინის რუსეთი წარმოადგენს, კონტროლის ქვეშ ყოფნას და არასოდეს ვიტყვით უარს ჩვენი ქვეყნისა და ჩვენს პერსონალურ თავისუფლებაზე, როგორც თავისუფალი ქვეყნის მოქალაქეების. ამიტომ, ამ ტრაგედიის ფონზეც კი, არის ჩვენი საზოგადოების გამარჯვების დღე და ჩვენი მორალური ვალია დღესაც, როცა ამ ბოროტების იმპერიის მემკვიდრე, პუტინის რუსეთი არის მთავარი საფრთხე ჩვენი თავისუფლებისთვის, ამ მსხვერპლს, რომელიც შეეწირა ჩვენს თავისუფლებას, მათ ხსოვნას გავუფრთხილდეთ პირველ რიგში იმით, რომ აღარასდროს დავუშვათ, ჩვენი თავისუფლება გარედან ვინმემ წაგვართვას; ვიყოთ ერთიანი ამ საფრთხის წინააღმდეგ და ვიყოთ ერთიანი ჩვენი თავისუფლების დასაცავად", — თქვა ბოკერიამ.

9 აპრილის ტრაგედიიდან 32 წელი გავიდა. 1989 წლის 4 აპრილს სეპარატიზმისა და მოსკოვის ანტიქართული პოლიტიკის წინააღმდეგ მშვიდობიანი აქციები დაიწყო, რომელიც მალევე დამოუკიდებლობის მოთხოვნაში გადაიზარდა. 9 აპრილს, გამთენიას რუსულმა არმიამ რუსთაველის გამზირზე შეკრებილი ხალხის დარბევა დაიწყო. მშვიდობიან, ხელაწეულ დემონსტრანტებს მომწამლავი ქიმიური საშუალებები, ცეცხლსასროლი იარაღი, სასანგრე ბარები, ჯავშანტრანსპორტიორები და ტანკები დაუპირისპირეს.

სადამსჯელო ღონისძიებებს 21 ადამიანის სიცოცხლე ემსხვერპლა, მათგან 17 ქალია. ქალებს შორის ყველაზე უმცროსები 16 წლის უფროსი კი 70 წლის. იმდროინდელ ბეჭდურ გამოცემებთან ინტერვიუში აქციის მონაწილეები იხსენებენ, რომ ჯარისკაცები ყველაზე აგრესიულები ორსულების და მოხუცების მიმართ იყვნენ.

1991 წლის 9 აპრილს კი, მოსახლეობის ნებაზე დაყრდნობითა და პირველი რესპუბლიკის დამოუკიდებლობის აქტის საფუძველზე უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა და აქტი გამოსცა.