ჯანდაცვის მინისტრის მოადგილის, თამარ გაბუნიას განცხადებით, ჯერჯერობით, ვაქცინაცია ნებისმიერი პირისთვის ნებაყოფლობითია, თუმცა არ გამორიცხავს, რომ ეს საკითხი ვაქცინაციის საბჭომ კიდევ განიხილოს და შესაძლოა, მედპერსონალის იმუნიზაციისთვის დამატებითი წახალისება დაწესდეს.

"ჯერჯერობით, ჩვენ შევთანხმდით იმაზე, რომ ვაქცინა ნებაყოფლობითი იქნება, იქნება ეს ჯანდაცვის სფეროს მუშაკი, თუ ნებისმიერი სხვა პირი, მას გაიკეთებს მისი გადაწყვეტილების საფუძველზე. სამომავლოდ, ამას კიდევ განიხილავს ვაქცინაციის საბჭო. იმდენად მნიშვნელოვანია ჯანდაცვის სექტორში უსაფრთხო გარემოს შენარჩუნება, რომ შესაძლოა, გარკვეულად მეტი სტიმული, დადებითი მოტივაცია, ან გარკვეულწილად, დამსაქმებლის მხრიდან გარკვეული მოთხოვნების დაყენება ვაქცინაციასთან დაკავშირებით. არ გამოვრიცხავ, რომ ეს საკითხიც განვიხილოთ, მაგრამ დღეს ეს ყველაფერი კეთდება კეთილი ნების და პირის გადაწყვეტილებიას საფუძველზე", — განაცხადა თამარ გაბუნიამ დღის კურიერში.

6 აპრილის მონაცემებით, საქართველოში კორონავირუსის 897 ახალი შემთხვევა დადასტურდა, გამოჯანმრთელდა 196, ხოლო გარდაიცვალა — 10 ადამიანი.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 3,65%, ბოლო 14 დღის განმავლობაში — 1,94%, ხოლო 7 დღის — 2,32%.