ჯანდაცვის მინისტრის, ეკატერინე ტიკარაძის განცხადებით, ჩინური ვაქცინა სინოფარმის სანდოობასთან დაკავშირებით კითხვები არ ისმება. მინისტრის განმარტებით, უნგრეთის მკაცრმა მარეგულირებელმა აღიარა სინოფარმი, რის საფუძველზეც ქვეყანაში მისი შემოტანა გახდა შესაძლებელი. აპრილის შუა რიცხვებში კი ჯანდაცვის მსოფლიო ორგანიზაციის მხრიდან ვაქცინის ავტორიზაციას ელიან.

"40 მილიონზე მეტი ადამიანი უკვე აცრილია სინოფარმით და მის სანდოობაზე კითხვები არ ისმის", — აღნიშნავს ჯანდაცვის მინისტრი.

როგორც ტიკარაძე ამბობს, ამ კვირაში ვაქცინაციის საბჭოზე სინოფარმთან დაკავშირებით იმსჯელებენ და გეგმას დასახავენ:

"ველოდებით კონკრეტულ პასუხებს ჯანდაცვის მსოფლიო ორგანიზაციიდან, რადგან ჩვენთვის ცნობილია, რომ სინოფარმი ელოდება მათი მხრიდან რეგისტრაციას, რაც მოგვცემს საშუალებას, რომ 15 აპრილიდან მოქალაქეებისთვის ხელმისაწვდომი გახდეს რეგისტრაციის მოდული".

3 აპრილს საქართველოში ჩინური ვაქცინის, სინოფარმის 100 000 დოზა ჩამოვიდა. რაც შეეხება სინოფარმის შენახვას, ჯანდაცვის სამინისტროში ამბობენ, რომ მას არ სჭირდება განსაკუთრებული პირობები და ინახება 2-დან 8 გრადუსამდე ტემპერატურულ რეჟიმში, რაც არის რუტინული რეჟიმი იმუნიზაციის პროგრამისთვის.

ვაქცინის ეფექტურობისთვის 21-დღიანი შუალედით 2 დოზა უნდა გაკეთდეს.