ეკონომიკის მინისტრის განცხადებით, ვიდრე მოსახლეობა არ დარწმუნდება იმაში, რომ ნამახვანი ჰესის კაშხალი რეალურად უსაფრთხოა, მშენებლობა არ დაიწყება.

"მზად ვართ, თითოეულ ამ კვლევაზე ვისაუბროთ — რა კითხვები არსებობს, როგორ გავაუმჯობესოთ საჭიროების შემთხვევაში და ვიდრე არ გვექნება სრული გარანტიები და ეს გარანტიები არ იქნება ცნობილი მოსახლეობისთვის, ვიდრე არ დავარწმუნებთ მათაც, რომ ნამახვანი ჰესის კაშხალი არის რეალურად უსაფრთხო, რაშიც ჩვენ ვართ დარწმუნებულები, მაგრამ გვინდა, რომ მეტი ნდობა შეიქმნას მოსახლეობაში, მანამდე კაშხლის და წყალსაცავის მშენებლობა არ დაიწყება", — განაცხადა მინისტრმა.

მისივე თქმით, ის მიზეზი, რაც იწვევდა ნამახვანი ჰესის უსაფრთხოებასთან დაკავშირებულ გულწრფელ წუხილს, მოხსნილია — კაშხლის მშენებლობა გადაიდო, ვიდრე პასუხი არ გაეცემა ყველა კითხვას.

"ჩვენს გვსურს ყველა, მათ შორის ადგილობრივი მოსახლეობა დარწმუნდეს იმაში, რომ მთავარი წუხილი, რაც უკავშირდებოდა კაშხლის და ზოგადად ჰესის უსაფრთხოებას, მოხსნილია და არ არსებობს რაიმე საფუძველი იმისთვის, რომ ნამახვანი ჰესი საფრთხეს შეგვიქმნის და დაგვაზარალებს", — აცხადებს თურნავა.

მისივე თქმით, ყველა კვლევა, რომელიც ჩატარებულია კომპანიის მხრიდან და გადამოწმებულია გარემოს დაცვის სამინისტროს მიერ, ღიაა ნებისმიერი დაინტერესებული პირისთვის და ვიდრე კაშხლის მშენებლობა შეჩერებულია, პროექტი სიღრმისეულად გადამოწმდება.

"კომპანიასთან შეთანხმებით, კაშხლის მშენებლობა გადაიდო და ის არ დაიწყება უახლოესი რამდენიმე თვის განმავლობაში, ვიდრე ყველა კითხვას არ გაეცემა პასუხი. კომპანია, კანონით მინიჭებული უფლებამოსილების ფარგლებში, დღეს ახორციელებს საგზაო სამუშაოებს", — აცხადებს თურნავა.