საქართველოს შინაგან საქმეთა სამინისტროს ინფორმაციით, რიონის ხეობაში სიგნალს არ ახშობს. ამის შესახებ უწყება სპეციალურ განცხადებაში საუბრობს და აღნიშნავს, რომ იქ განთავსებული სპეციალური სატრანსპორტო საშუალება რადიოკავშირის გამართულ მუშაობას უზრუნველყოფს.

"კიდევ ერთხელ ხაზგასმით აღვნიშნავთ, რომ საპოლიციო ინფრასტრუქტურა წარმოადგენს შიდა რადიოკავშირის გამაძლიერებელ მექანიზმს, რომელსაც არანაირი შემხებლობა არ აქვს ფიჭურ და სატელეფონო კავშირგაბმულობასთან, ის გამოიყენება საპოლიციო დანაყოფებს შორის რადიოკავშირის (რაციით კავშირის) გამართული მუშაობის მიზნით. რიონის ხეობაში აღნიშნული საპოლიციო ინფრასტრუქტურა რთული რელიეფური მდებარეობის და გართულებული კავშირგაბმულობის მიზეზით განთავსდა", — ამბობენ უწყებაში.

რაც შეეხება რიონის ხეობაში მოქალაქეთა გადაადგილების შეზღუდვას, უწყებაში ამბობენ, რომ ის დროებით ძალაში რჩება, რათა თავიდან იქნას აცილებული მოსალოდნელი საფრთხეები და სიტუაციის შემდგომი ესკალაცია.

ამასთან, შსს-ს განცხადებით, ხეობაში შინაგან საქმეთა სამინისტროს სხვადასხვა დანაყოფის თანამშრომლები, ნამახვანჰესის წინამოსამზადებელი სამუშაო პროცესის განახლებასთან დაკავშირებით, უსაფრთხოებისა და მართლწესრიგის დაცვის მიზნით არიან მობილიზებულები.

უწყება მოუწოდებს მოქალაქეებს, "არ გასცდნენ გამოხატვის თავისუფლების კანონით დასაშვებ ფარგლებს, დაემორჩილონ პოლიციის მოთხოვნებს", თუმცა აღნიშნავს, რომ უზრუნველყოფს გამოხატვის თავისუფლებას, რომელიც არ გასცდება კანონით დასაშვებ ფარგლებს.

რიონის ხეობაში სიგნალის ჩახშობის შესახებ ინფორმაცია აქამდეც ვრცელდებოდა, თუმცა გუშინ, 3 აპრილს, ინტერნეტი საერთოდ არ მუშაობდა. ამის გამო შეუძლებელი იყო ხეობიდან ინფორმაციის გავრცელება, მათ შორის, მუშაობაში ხელი შეეშალათ ჟურნალისტებსაც. ამასთან, გავრცელდა სპეციალური მანქანის ფოტო, რომელსაც მოაზრებდნენ სიგნალის ჩამხშობ ტექნიკად და შსს სწორედ ამ მანქანაზე ამბობს, რომ დანაყოფებს შორის რადიოკავშირისთვის იყენებს.

აღსანიშნავია, რომ სიგნალის ჩახშობის შესახებ საუბარია სახალხო დამცველის განცხადებაშიც. ომბუდსმენმა შსს-ს მოუწოდა, არ ჩაახშოს სიგნალი და განაცხადა, რომ ჩამხშობი აპარატის გამოყენება გახდა გამოხატვისა და ინფორმაციის გავრცელების ხელშემშლელი ფაქტორი.