უწყებათშორისი საკოორდინაციო საბჭოს გადაწყვეტილებით, ოზურგეთის მუნიციპალიტეტის სოფელ შრომაში, ლანჩხუთის მუნიციპალიტეტის სოფლებში — ჭყონაგორასა და ჩოჩხათში, ასევე ზუგდიდის მუნიციპალიტეტის სოფელ ორსანტიაში პოლიციის საკონტროლო პუნქტები ამოქმედდა.

ამასთან, გურიის რეგიონში, დასახელებულ სოფლებში სპეციალური ინფრასტრუქტურა მოეწყო და საგანგებო სიტუაციების მართვის სამსახურის თანამშრომლებმა აღნიშნული პუნქტების ტერიტორიაზე საველე კარვები ააწყვეს.

უწყებათშორისი საკოორდინაციო საბჭოს გადაწყვეტილებით, ჩამოთვლილ სოფლებში შემსვლელ და გამომსვლელ მოქალაქეებს ადგილზე თერმოსკრინინგი ჩაუტარდებათ, ასევე, საჭიროების შემთხვევაში — ტესტირება.

შსს განმარტავს, რომ ამ სოფლებში მოქალაქეთა შესვლა-გამოსვლა არ იზღუდება და არც სხვა მკაცრი საკარანტინო შეზღუდვები წესდება.

უწყებაში ამბობენ იმასაც, რომ საკონტროლო პუნქტების მიზანი COVID-19-ის გავრცელების პრევენცია და მოქალაქეთა "აქტიური" მონიტორინგია.

შსს მოუწოდებს მოქალაქეებს, ატარონ პირბადე და დაემორჩილონ არსებულ რეგულაციებს.