საზოგადოებრივი მაუწყებლის სამეურვეო საბჭო აღმასრულებელ საბჭოს მაუწყებლის არხების მუშაობის შეფასების ოთხპუნქტიან გეგმას სთავაზობს. ეს კრიტერიუმებია: ხარისხი, წვდომა, ფასეულობა დანახარჯებთან მიმართებით და ზეგავლენა. ეს ხედვა სამეურვეო საბჭომ გენერალურ დირექტორს სამუშაო შეხვედრაზე დღეს, 16 თებერვალს წარუდგინა.

სამეურვეო საბჭოს წარმოუდგენია, რომ სქემა, რომლითაც უნდა შეფასდეს მაუწყებლის მუშაობა საწყისი წერტილი ნულია, რომელიც ორი ერთმანეთის მართობული სხივის გადაკვეთის წერტილია (იხილეთ ფოტო). საბჭოს აზრით, რაც უფრო სწრაფად გაიზრდება ოთხკუთხედის ფართობი, მით უკეთესია მაუწყებლის განვითარების ტემპი.

სამეურვეო საბჭო აღმასრულებელი საბჭოსთვის წარდგენილ დოკუმენტში განმარტავს, რას გულისხმობს თითოეულ კრიტერიუმში.

ხარისხი

ხარისხში იგულისხმება როგორც კანონით განსაზღვრული, ასევე თვისობრივი მახასიათებლები. ამ მახასიათებლების გაზომვის მექანიზმებია სოციოლოგიური კვლევა, საექსპერტო შეფასება და სხვა მეთოდები. გაზომვასთან ერთად, მაუწყებლის მნიშვნელოვანი მეთოდია მსჯელობა, ანალიზი, მათ შორის საზოგადოების წარმომადგენელთა ჩართულობით.

წვდომა და წილი

ეს კრიტერიუმი აჩვენებს, თუ რამდენი მომხმარებელი ჰყავს მაუწყებელს და როგორია მაუწყებლის წილი მომსახურების იმ ველზე, სადაც ის ათავსებს საკუთარ პროდუქციას. მაუწყებლის ვალდებულებების შესრულების შესაფასებლად საჭიროა წვდომისა და წილის ცოდნა განსხვავებული პლატფორმების, ტერიტორიების და სოციალური ჯგუფების მიხედვით.

ფასეულობა დანახარჯებთან მიმართებით

ეს კრიტერიუმი დანახარჯებსა და საზოგადოებრივი მაუწყებლის მიერ მიღწეულ შედეგებს შორის, მაუწყებლის მიერ გაწეული დანახარჯების ეფექტიანობას ზომავს - თუ რამდენად ეკონომიურად, ეფექტურად და ეფექტიანად მართავს მენეჯმენტი მაუწყებელს.

ზეგავლენა

ზეგავლენა ზოგადი სარგებელია, რომელიც მოაქვს მაუწყებელს საზოგადოებისთვის და თითოეული ადამიანისთვის. მას წესით უნდა მოჰყვებოდეს გარკვეული ცვლილებები საზოგადოებაში. ზეგავლენის გაზომვის სხვადასხვა მეთოდია, მათ შორის, სოციოლოგიური კვლევები (აუდიტორიის აღქმის ინდექსი), ციტირების ინდექსები, ფაქტებზე დამყარებული სხვა მეთოდები.

"მენეჯმენტს, ოპერაციული მართვის მიზნებისთვის, აქვს შესაძლებლობა, ამ კრიტერიუმების ფარგლებში შეიმუშაოს ცალკეული გადაცემების შეფასების სისტემა. ამგვარი შეფასება შეიძლება დამატებით მოიცავდეს ისეთ პროფესიულ მახასიათებლებს, როგორებიცაა ჟურნალისტიკის სტანდარტები, მეტყველება, გამოსახულება, რეჟისურა, განათება, გაფორმება და სხვა," - ვკითხულობთ სამეურვეო საბჭოს მიერ შემუშავებულ დოკუმენტში.