ნინოწმინდაში აგრარული ბაზრის მშენებლობისთვის 2019 წელს 153 ათასი ლარი დაიხარჯა, თუმცა ბაზარი დაკატეტილია და არ ფუნქციონირებს. ამის შესახებ ნინოწმინდის მუნიციპალიტეტის 2018-2019 წლების საქმიანობის შესაბამისობის აუდიტშია საუბარი.

როგორც ანგარიშში ვკითხულობთ, ბაზრის დაკეტვა იმითაა გამოწვეული, რომ მოვაჭრეები არ გადადიან ახალაშენებულ შენობაში და განაგრძობენ გარე ვაჭრობას, ხოლო მუნიციპალიტეტს შენობის ფუნქციური დატვირთვისთვის არაფერი გაუკეთებია.

ამასთან, აუდიტის ანგარიშში აღნიშნულია, რომ 2018-2019 წლებში ფინანსური აქტივების მართვის ხარვეზების გამო, მუნიციპალიტეტმა ვერ უზრუნველყო მნიშვნელოვანი ინფრასტრუქტურული პროექტების დასრულება. მერიას 1,2 მილიონი ლარის არაეფექტიანი ხარჯი აქვს გაწეული, რომელიც დაუსრულებელ და გამოუყენებელ პროექტებს მოიცავს.

ანგარიშის თანახმად, 351,9 ათასი ლარის ღირებულების სპორტული, საგანმანათლებლო და სხვა დანიშნულების ინფრასტრუქტურული პროექტები დაუსრულებელი და გამოიუყენებელია. ამასთან, რამდენიმე სოფელში ამბულატორიების მოწყობისთვის 696,6 ათასი ლარი დაიხარჯა, თუმცა ისინი არ ფუნქციონირებს.