ნინოწმინდის მუნიციპალიტეტის რამდენიმე სოფელში ამბულატორიების მოწყობისთვის 696,6 ათასი ლარი დაიხარჯა, რომლებიც არ ფუნქციონირებს. შენობები შესაბამისი ინვენტარით აღჭურვილი არაა.

ამის შესახებ ნინოწმინდის მუნიციპალიტეტის 2018-2019 წლების საქმიანობის შესაბამისობის აუდიტშია საუბარი. როგორც დოკუმენტში ვკითხულობთ, ამ პერიოდში ფინანსური აქტივების მართვის ხარვეზების გამო, მუნიციპალიტეტმა ვერ უზრუნველყო მნიშვნელოვანი ინფრასტრუქტურული პროექტების დასრულება. მერიას 1,2 მილიონი ლარის არაეფექტიანი ხარჯი აქვს გაწეული, რომელიც დაუსრულებელ და გამოუყენებელ პროექტებს მოიცავს.

აუდიტის ანგარიშის თანახმად, 351,9 ათასი ლარის ღირებულების სპორტული, საგანმანათლებლო და სხვა დანიშნულების ინფრასტრუქტურული პროექტები დაუსრულებელი და გამოიუყენებელია. ამასთან, 2019 წელს აგრარული ბაზრის აშენებისთვის მუნიციპალიტეტმა 153 ათასი ლარი დახარჯა, თუმცა ის დაკეტილია.