საქართველოს სტატისტიკის ეროვნული სამსახურის ინფორმაციით, 2020 წელს საქართველოში წინა წელთან შედარებით ადგილობრივი ვიზიტორების (ნებისმიერი ადამინი, რომელიც მოგზაურობს მისი საცხოვრებელი ქვეყნის ფარგლებში) რაოდენობა 8,3%-ით შემცირდა.

"2020 წელს, საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 910,8 ათასით განისაზღვრა, რომლებმაც ქვეყნის ტერიტორიაზე განახორციელეს 1 მილიონი ვიზიტი. აღნიშნულ პერიოდში ვიზიტორების რაოდენობა 8,3%-ით ნაკლებია 2019 წლის შესაბამის მონაცემებზე", — ნათქვამია განცხადებაში.

მათივე ინფორმაციით, რეზიდენტი ვიზიტორების მიერ საქართველოს ტერიტორიაზე განხორციელებული ვიზიტების რაოდენობა 9,5%-ით არის შემცირებული.

"2020 წელს საქართველოს რეზიდენტი ვიზიტორების მიერ საქართველოს ტერიტორიაზე განხორციელებული ტურისტული ტიპის ვიზიტების საშუალო თვიური რაოდენობა 480,4 ათასით განისაზღვრა, რაც 9,5%-ით ნაკლებია წინა წლის მაჩვენებელთან შედარებით. ქვემოთ მოცემული დიაგრამა ასახავს საქართველოს რეზიდენტი ვიზიტორების მიერ განხორციელებული ვიზიტების რაოდენობის განაწილებას ვიზიტის ტიპის მიხედვით", — წერია განცხადებაში.