ეკონომიკის მინისტრის, ნათია თურნავას განცხადებით, ორი დღის წინ გამართულ აქციაზე წმინდა პოლიტიკური მოთხოვნები გაისმოდა და მათთვის ულტიმატუმის ენა მიუღებელია.

"ორი დღის წინ აქციაზე გაისმოდა წმინდა პოლიტიკური მოთხოვნები, რასაც არანაირი კავშირი არ აქვს ეკოლოგიასთან, პროექტთან დაკავშირებულ საკითხებთან. რასაკვირველია, ჩვენთვის მიუღებელია ულტიმატუმის ენა. რაც შეეხება გადადგომას ან დანიშვნას, ყველას შევახსენებ, რომ საქართველოს მთავრობის წევრის გადაყენება ან დანიშვნა, ეს არის პრემიერ-მინისტრის პრეროგატივა და არა რომელიმე აქტივისტის მიერ აქციაზე გაჟღერებული მოთხოვნა. თუმცა კიდევ ერთხელ მინდა, ვთქვა, რომ ჩვენ ძალიან მნიშვნელოვანი შეთავაზებები და გადაწყვეტილებები მივაწოდეთ მოსახლეობასაც და ექსპერტებსაც", — განაცხადა მინისტრმა.

მისივე თქმით, კარი დიალოგისთვის კვლავ ღიაა კონსტრუქციულ პლატფორმაზე.

"ჩვენი კარი კვლავაც ღიაა დიალოგისთვის, ოღონდაც ამ კონსტრუქციულ პლატფორმაზე. ველით მოსახლეობის წარმომადგენლებს, ექსპერტებს, რათა ჩაერთონ, გააკეთონ პროექტის რევიზია, გადაამოწმონ ის კვლევები, რაც უკვე გაკეთებულია. ყველამ ერთად ვიზრუნოთ, რომ ჩვენი ენერგეტიკა, ჩვენი ეკონომიკა გახდეს უფრო ძლიერი და მოწოდებები, რომ ჩაიშალოს, გავაგდოთ ინვესტორი, გაჩერდეს, არ ავაშენოთ, ეს არ არის ჩვენი ლექსიკა, განსაკუთრებით პოსტპანდემიურ წელს. ყველანი განვითარებისკენ უნდა ვისწრაფოდეთ", — განაცხადა თურნავამ.

14 მარტს ქუთაისში ნამახვანჰესის მშენებლობის წინააღმდეგ გამართული მასშტაბური აქციაზე ეკონომიკის მინისტრის, ნათია თურნავას გადადგომა მოითხოვეს და მოთხოვნების შეუსრულებლობის შემთხვევაში აქციების თბილისში გადმოტანა დააანონსეს.