საქართველოს შინაგან საქმეთა სამინისტროს ინფორმაციით, ნინოწმინდის მუნიციპალიტეტის ერთ-ერთ სოფელში მამა-შვილმა სომხეთიდან სამი ადამიანი მოტყუებით გადმოიყვანა, ჩამოართვეს პირადობის მოწმობები და იძულებით, ანაზღაურების გარეშე ამუშავებდნენ. უწყების განცხადებით, ბრალდებულები უკვე დააკავეს.

"ბრალდებულები 2015-2016 წლებში სომხეთის რესპუბლიკის სამ მოქალაქეს კარგ სამუშაო პირობებს დაჰპირდნენ, დაეხმარნენ მათ საჭირო დოკუმენტაციის შეგროვებაში და საკუთარი ავტომობილით საქართველოში ჩამოიყვანეს. ბ.წ.-მ და მ.წ.-მ აღნიშნული პირები მიიყვანეს ნინოწმინდის მუნიციპალიტეტის ერთ-ერთი სოფლის ახლოს მდებარე საქონლის ფერმაში, სადაც მუქარითა და იძულებით უწევდნენ შრომით ექსპლუატაციას, ჩამოართვეს პირადობის დამადასტურებელი დოკუმენტაცია და ანაზღაურების გარეშე, მრავალი წლის განმავლობაში ამყოფებდნენ მონობის თანამედროვე პირობებში. გარდა ამისა, ბრალდებულები უკანონოდ დატყვევებულ ადამიანებს თავისუფლად გადაადგილებას უზღუდავდნენ და მუდმივად აკონტროლებდნენ, როგორც პირადად, ასევე, საცხოვრებელ სახლსა და მის მიმდებარე ტერიტორიაზე დამონტაჟებული სათვალთვალო ვიდეოკამერების საშუალებით", — აცხადებენ შსს-ში.

მათივე თქმით, სამართალდამცველებისთვის დანაშაულის შესახებ მაშინ გახდა ცნობილი, როცა სომხეთის ერთ-ერთმა მოქალაქემ ფერმიდან გაქცევა მოახერხა და სომხეთის მიმართულებით საზღვრის უკანონოდ გადაკვეთა სცადა.

შსს-ს ინფორმაცით, საქმეზე გამოძიება საქართველოს სისხლის სამართლის კოდექსის 143-ე მუხლის "ბ" დ "ე" ქვეპუნქტებით მიმდინარეობა, რაც სამი პირის მიმართ ჯგუფურად ჩადენილ ადამიანით ვაჭრობს (ტრეფიკინგს) გულიხმობს. დანაშაული 12-დან 15 წლამდე ვადით თავისუფლების აღკვეთას ითვალისწინებს.