ჯანდაცვის სამინისტროში აცხადებენ, რომ COVID-19-ის საწინააღმდეგო ვაქცინაციის ელექტრონულ სისტემაში ვიზიტი ამ დროისათვის 1 449 მედპერსონალს აქვს დაჯავშნილი.

მათივე თქმით, რეგისტრაცია შეუფერხებლად მიმდინარეობს. ვაქცინაციის პროცესი ორშაბათს, 15 მარტიდან ჯანდაცვის სამინისტროს მიერ შერჩეულ სამედიცინო დაწესებულებებში დაიწყება.

უწყების ცნობით, კორონავირუსის საწინააღმდეგო ვაქცინაციას ექვემდებარება ჯანდაცვის სექტორში დასაქმებული ყველა პირი — ექიმი, ექთანი, სანიტარი, ლაბორანტი, სტომატოლოგი, საზოგადოებრივი ჯანდაცვის სპეციალისტი, ეპიდემიოლოგი, ადმინისტრაციული მუშაკები (მენეჯერი, მძღოლი, რეგისტრატორი და ა.შ).

"თუ ჯანდაცვის სექტორში დასაქმებული პირი დამსაქმებელს რეგისტრირებული ჰყავს დასაქმებულად სპეციალურ ელექტრონულ სისტემაში და მას ბოლო 120 დღის განმავლობაში კორონავირუსზე ინფიცირების სტატუსი არ უფიქსირდება, მას შეუძლია COVID-19-ის საწინააღმდეგო ვაქცინაციისთვის მისთვის სასურველ სამედიცინო დაწესებულებაში დარეგისტრირდეს", — აცხადებენ სამინისტროში.

მათივე ინფორმაციით, ჯანმრთელობის მსოფლიო ორგანიზაცია, საზოგადოებრივი ჯანდაცვის უწყებები და კვალიფიციური ექიმები COVID-19-ის საწინააღმდეგო ვაქცინაციას რეკომენდაციას უწევენ.

გაიგეთ მეტი: