ქუთაისში, სადაც ამ წუთებში ნამახვანჰესის მშენებლობის წინააღმდეგ მასშტაბური აქცია იმართება, ეკონომიკის მინისტრის, ნათია თურნავას გადადგომა მოითხოვეს და მოთხოვნების შეუსრულებლობის შემთხვევაში აქციების თბილისში გადმოტანა დააანონსეს.

ჰესის მშენებლობის მოწინააღმდეგე აქტივისტის, ვარლამ გოლეთიანის თქმით, ასევე, ენერგეტიკის სექტორში მორატორიუმი უნდა გამოცხადდეს და კანონმდებლობის განსასაზღვრად მსჯელობა უნდა დაიწყოს, სადაც მოსახლეობის ნება იქნება ასახული.

"გადადგეს ეკონომიკის მინისტრი, ნათია თურნავა, რომელმაც ათასობით ადამიანს, რომლებსაც კითხვებზე პასუხი სჭირდებოდათ შეურაცხჰყოფა მიაყენა და თქვა, რომ ამ ხალხს სჭირდება ცნობიერების ამაღლება", — განაცხადა გოლეთიანმა.

მისივე თქმით, აქციის მონაწილეები დღეს არ დაიშლებიან და ღამეც ქუთაისში დარჩებიან.

აქციაზე ისმის ქსენოფობიური გამონათქვამები, რომელსაც გამომსვლელთა ნაწილი ემიჯნება.

მეოთხე თვეა ნამახვანის ჰესის აშენებას ეწინააღმდეგება ადგილობრივი მოსახლეობა. ისინი ხეობიდან კომპანიის გასვლასა და მშენებლობის შეჩერებას მოითხოვენ. ადგილობრივების პროტესტს მხარს უჭერს არასამთავრობო ორგანიზიაციათა ნაწილი. მათი განცხადებით, სახელმწიფომ ისე გასცა ჰესის მშენებლობის ნებართვა, რომ მშენებელ კომპანიას საჭირო კვლევები და დოკუმენტები არ ჰქონდა წარმოდგენილი. ამავე დროს, ქართულ ოცნებაში მიაჩნიათ, რომ ადგილობრივი მოსახლეობისთვის არაა ნაჩვენები ნამახვანჰესის სიკეთეები და მეტი კომუნიკაციაა საჭირო.

ნამახვანიჰესის კასკადის მშენებლობა მდინარე რიონზეა დაგეგმილი, რომელიც ორ ჰესს მოიცავს, ქვემო და ზემო ნამახვანჰესს. ორივე ჰესი ერთად 433 მგვტ სიმძლავრის უნდა იყოს. პროექტი 850 მილიონი აშშ დოლარის ღირებულებისაა და კასკადის ექსპლუატაციაში შესვლა 2025-2026 წელს არის დაგეგმილი. პროექტს თურქულიკომპანია ენკა რინიუებლზ ახორციელებს.

ადამიანის უფლებების სწავლებისა და მონიტორინგის ცენტრის (EMC) განცხადებით, ნამახვანჰესის ხელშეკრულებით მნიშვნელოვანი სახელმწიფო ინტერესები დათმობილია კერძო კომპანიის სასარგებლოდ. როგორც ორგანიზაციაში ამბობენ, პროექტს არათუ ვერ ექნება ის წვლილი ქვეყნის ენერგოუსაფრთხოებაში, რაზეც მთავრობა მიუთითებს, არამედ შეთანხმება ქვეყნის ბიუჯეტისთვის მძიმე და განუსაზღვრელ ფისკალურ ტვირთებს ითვალისწინებს.

EMC-ს პასუხად, ეკონომიკის სამინისტრო აცხადებს, რომ აღნიშნული დასკვნა სპეკულატიური და დილეტანტურია. გარდა ამისა, სამინისტრო ხაზს უსვამს, რომ აღნიშნული პროექტი ენერგოდამოუკიდებლობსკენ გადადგმული ნაბიჯია.

12 მარტს, ნათია თურნავამ განაცხადა, რომ არსებული კვლევების გადამოწმებამდე კაშხლისა და წყალსაცავის მშენებლობა არ დაიწყება. თუმცა ამბობს, რომ ეს გადაწყვეტილება მოსახლეობის ნდობის მოსაპოვებლად მიიღო და დარწმუნებულია, რომ ახალი აღმოჩენა არ იქნება.

ENKA-ს განცხადებით, ნამახვანჰესის პროექტის შესაბამისობას, არსებულ ადგილობრივ და საერთაშორისო გარემოსდაცვით და სოციალურ სტანდარტებთან, განიხილავს კომპანია "რამბოლი", როგორც დამოუკიდებელი კონსულტანტი.

მათივე თქმით, "რამბოლი" მაღალი რეპუტაციის მქონე მულტინაციონალური საკონსულტაციო კომპანიაა, რომელიც მოქმედებს პირველი კლასის საერთაშორისო ფინანსური ინსტიტუტის სახელით. ეს უკანასკნელი უზრუნველყოფს პროექტის ფინანსურ სტაბილურობას და ასევე გარანტიას იღებს ყველაზე მაღალ საერთაშორისო სტანდარტებთან შესაბამისობაზე, რომელიც ეხება, როგორც სოციალურ და გარემოსდაცვით მდგრადობას, ასევე უსაფრთხოებასა და ტექნიკურ გამართულობას.

გაიგეთ მეტი:

• თუ რაიმე გახდა დასაკორექტირებელი, კომპანია თავის თავზე აიღებს — თურნავა ნამახვანჰესზე კვლევების გადამოწმებაზე
• კვლევების გადამოწმებამდე ნამახვანჰესის კაშხლისა და წყალსაცავის მშენებლობა არ დაიწყება — თურნავა
• უკიდურესად შეურაცხყოფილნი ვართ ყველა — გოლეთიანი მინისტრებთან შეხვედრის შემდეგ
• ვამზადებთ პაკეტს, რომლითაც ინვესტორი მეტ სოციალურ პასუხისმგებლობას აიღებს — თურნავა ნამახვანჰესზე