საქართველოს შინაგან საქმეთა სამინისტრო ტელეკომპანია ფორმულას, ჟურნალისტების მიერ მომზადებული მასალის გამო, სასამართლოში უჩივლებს. უწყებაში ამას თანამშრომლების ღირსების დაცვას უწოდებენ.

მათი ეს რეაგირება გამოიწვია შაბათის ფორმულაში გასულმა სიუჟეტმა, რომლის მიხედვით, შკოდას, რომელმაც სექსმუშაკი სუტინიორთან ერთად მისამართზე მიაცილა, შსს-ს მაღალჩინოსანი მართავს.

"ხაზგასმით აღვნიშნავთ, რომ სიუჟეტში მათ მიერ დასახელებული შინაგან საქმეთა სამინისტროს თანამშრომელი გადაცემაში ნახსენებ კონკრეტულ დროს არ იმყოფებოდა მათ მიერ დასახელებულ ადგილას და არ გადაადგილდებოდა კადრებში ნაჩვენები სახელმწიფო ნომრიანი ავტომობილით. შინაგან საქმეთა სამინისტრო არ დატოვებს რეაგირების გარეშე ტელეკომპანია ფორმულას მიერ არაერთხელ მიზანმიმართულად გავრცელებულ ცრუ ინფორმაციას, უახლოეს დღეებში მოახდენს სამართლებრივ რეაგირებას და საკუთარი თანამშრომლების ღირსებას სასამართლოში დაიცავს", — აცხადებენ შსს-ში.

უწყების მტკიცებით, ფორმულა "არაერთი წარუმატებელი მცდელობის შემდეგ", კვლავ აგრძელებს მაყურებლის შეცდომაში შეყვანას და ამ გზით საზოგადოებაში პოლიციის მიმართ ნდობის შესუსტებას. უწყებაში ამბობენ, რომ ტელეკომპანიამ მაყურებელს პოლიციელების მხრიდან კანონდარღვევის ვერც ერთი მტკიცებულება ვერ წარუდგინა.

შაბათის ფორმულამ ამ თემაზე რამდენიმე რეპორტაჟი მოამზადა, დღეს კი ტელეკომპანიის ჟურნალისმა თქვა, რომ გაარკვიეს, ვინ მართავს შკოდას სახელმწიფო ნომრით, რომელმაც სექსმუშაკი, სუტინიორთან ერთად კომენდანტის საათის დროს, ფორმულას მიერ შერჩეულ მისამართზე მიაცილა. მათივე ინფორმაციით, რამდენიმე დღიანი დაკვირვების შემდეგ, გაირკვა რომ შკოდას ამავე სამმართველოს უფროსის მოადგილე მართავს.