მარტია მოქალაქეების ლიდერი და პარლამენტის წევრი, ლევან იოსელიანი ამბობს, რომ კმაყოფილია ქართული ოცნების გადაწყვეტილებით, რომელმაც ოპოზიციონერი დეპუტატების მანდატების გაუქმებისგან "ამ ეტაპზე თავი შეიკავა".

"მე ვფიქრობ, რომ დღეს, ის გადაწყვეტილება, რაც მიიღო ქართულმა ოცნებამ, იყო სწორი, იმ თვალსაზრისით, რომ დატოვა სივრცე მოლაპარაკებისთვის. დატოვა სივრცე იმისათვის, რომ საბოლოოდ, პოლიტიკური კრიზისი განიმუხტოს მოლაპარაკების გზით.

ჩვენ ამას მოვუწოდებდით მთელი ეს პერიოდი და ვამბობდით, რომ თუ უფლებამოსილება, ოპოზიციონერი დეპუტატების, იქნება შეწყვეტილი, მაშინ კრიზისი კიდევ უფრო გაღრმავდება და პროცესები წავა იმ მიმართულებით, საიდანაც მობრუნება შეიძლება იყოს ძალიან რთული. მე ვარ ამ გადაწყვეტილებით კმაყოფილი", — განაცხადა ლევან იოსელიანმა.

საქართველოს პარლამენტმა იმ ოპოზიციონერ დეპუტატებს, რომელთაც მანდატის გაუქმების მოთხოვნით თავად მიმართეს საკანონმდებლო ორგანოს, მანდატი არ შეუჩერა.

ამ გადაწყვეტილების შესახებ პლენარული სხდომის გამართვამდე, მმართველი პარტიის ოფისში, უმრავლესობის ლიდერების შეკრების შემდეგ, პარტიის თავმჯდომარემ, ირაკლი კობახიძემ განაცხადა.