ქვემო ქართლის რეგიონში, ფონიჭალის ტერიტორიაზე უცნობმა პირებმა სომხურ სატვირთო მანქანებს ქვები დაუშინეს. საქართველოში სომხეთის საელჩოს ცნობით, სატვირთო მანქანების წინა და გვერდითი მინები დააზიანეს და შემთხვევის ადგილიდან მიიმალნენ. საელჩოში აცხადებენ, რომ შემდეგ სატვირთო მანქანები საპატრულო პოლიციის თანხლებით საქართველო-სომხეთის საზღვრამდე მივიდნენ და გადაკვეთეს იგი.

საელჩოში განმარტავენ, რომ მუდმივ კონტაქტში არიან საქართველოს შესაბამის ორგანოებთან, რათა დამნაშავეებმა ჩადენილის გამო პასუხი კანონის შესაბამისად აგონ.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება საქართველოს სისხლის სამართლის კოდექსის 187-ე მუხლით არის აღძრული, რაც ნივთის დაზიანებას ან განადგურებას გულისხმობს.