აჭარის უმაღლესი საბჭოს წევრი, ირაკლი ჩავლეიშვილის ამბობს, რომ მას არ მოუთხოვია იმ აქტივისტის დაკავება, ვინც თავზე ნაგავი დააყარა. ფორმულას ეთერში ჩავლეიშვილმა განაცხადა, რომ რა სამართლებრივი რეაგირება მოჰყვება ამ ფაქტს, სასამართლოს საქმეა და მას ამასთან დაკავშირებით არავითარი ინტერესი არ აქვს.

"მე არ ვითხოვდი მის ან დაჭერას, ან უფრო მკაცრი ზომების მიღებას. მართალი გითხრათ, ჩემი აზრით, ციხე არ არის ის ადგილი, სადაც ზრდილობას და განათლებას ასწავლიან. ეს არის დასჯადი ორგანიზაცია და არა მგონია, რომ იქედან უფრო ნორმალური გამოსულიყო.

ყველა ადამიანი თავის ქმედებაზე აგებს პასუხს და მართალი გითხრათ, სამართლებრივად რა კონტექსტში ჯდება და რა მუხლს წაუყენებენ, როგორ გადაწყდება სასამართლოს სხდომა, ეს არის იურისტების საქმე. ამაში, მართალი გითხრათ, მე არავითარ ინტერესი მაქვს და არც ვთვლი საჭიროდ, რომ რაღაც რეაგირება მოვახდინო ამასთან დაკავშირებით", — განაცხადა ირაკლი ჩავლეიშვილმა.

დღეს, ბრალის წარდგენის შემდეგ, გაათავისუფლეს აქტივისტი ირაკლი ფანგანი, რომელმაც 23 იანვარს ირაკლი ჩავლეიშვილს თავზე ნაგავი დააყარა. როგორც ალტერნატივის მიერ გავრცელებულ ვიდეოკადრებში ჩანს, მოქალაქეები ჩავლეიშვილს ქუჩაში შეხვდნენ. ისინი "მონა, მოღალატეს" სკანდირებდნენ და ეუბნებოდნენ, რომ აჭარის უმაღლეს საბჭოში გაყალბებული მანდატით შევიდა.

დეკემბერში ირაკლი ჩავლეიშვილმა რესპუბლიკური პარტია დატოვა და აჭარის უმაღლეს საბჭოში შესვლა გადაწყვიტა. პარტიის დატოვების მიზეზად იგი ბოიკოტთან დაკავშირებით განსხვავებულ პოზიციებს ასახელებდა.

გაიგეთ მეტი: